Claudio Ranieri, cumprida un’attera porfia de sa carriera sua, incumintzada propriu in Casteddu in su 1988 cun sa binchida doppia dae sa serie C a sa serie A, at a dassare sa banchina ruju e blu a sa fine de s’istagione. In d’unu nuntzu-video a sos tiffosos, su tecninu romanu chi tenet 72 annos, non faeddat de su tempus benidore sou.

At a sighire a allenare o che l’at accabbare? De sicuru sas offertas non mancant. Mancari su mattessi Ranieri eppat nadu pius bortas chi su Casteddu est bistadu s’urtimu club e chi mancari tiat aere sighidu a allenare una “Nazionale”. “Casteddu est e at essere semper sa domo tua.

Po semper reconnoschentes, Mister” iscriet sa sotziedade de su presidente Giulini supra su locu, in d’unu post longu meda in su cale si torrat a colare sa carriera de Ranieri, cun sas medas binchidas suas. Sa prima, in s’istagione 1988/1989: pigada in serie B. S’urtima, dominica passada. Binchida a su Mapei stadium 2-0 contra su Sassuolo e sardos salvos cun sa matematica. Chentza ispettare s’urtima zorronada, contra sa Fiorentina. Chi a custu puntu at divennere su Ranieri day. Cun tottu s’istadiu chi at acclamare s’omine de sos miraculos. Dae s’attera parte de sa Manica, a Leicester ne ischint carchi cosa. “ Su viaggiu meu est incumintzadu in su 1988. Tres annos ispantosos, pustis mi che so andadu e so diventadu mannu”.

Pustis de su passaggiu in serie A, chi mancari non nos ispettaimis gai in presse cando so arrivadu in su mese de Bennarzu, e custa salvesa mi paret zustu dassare, narat Ranieri. Est una detzisione tribulosa, tosta, leada cun su coro in manu, ma est zustu dassare como. Preferzo andare gai e non addurare un’atteru annu e cun sas cosas chi no podent andare bene. Giai timmia in su torrare, timmia de imbruttare sos tres annos chi appo bividu inoche e chi mi ant prenadu su coro.

In sos momentos de difficultade, mi attaccaia a Casteddu e a cust’isula galaverosa. E non cheria bennere, pustis cando appo leggidu sas paraulas de Gigi Riva (“Claudio est unu de nois”), so torradu. Appo pensadu de lassare sos egoismos e de andare a bi acconcare. Como est arrivadu su momentu de nos dassare. Mi auguro de essere ammentadu commente una persona positiva, chi at dimandadu azzudu a sos casteddajos e a sos sardos, chentza issos non bi l’ammos aere fatta, su pubbricu est bistadu s’omine in pius, non nos at abbandonadu mai. Appo bividu un’annu e mesu istravanadu. Gioggia bi at essere s’urtima partida e bos appo abbrazzare cun calore meda.”

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Dinamo Bancu de Sardigna patit sa secunda derrotta una fattu de s’attera in sa fase duos de sa Europe Cup, perdinde 76-83 cun sos frantzesos de Le Portel, in d’una partida giogada e pattada po casi tottu su tempus, ma chi est bistada detzisa in sos urtimos minutos .

Po sos tattaresos un’attera occasione perdida pustis de su passu falsu contra Bilbao, ma sas isperantzias de si qualifficcare addurant bivas. S’isquadra de coach Markovic si est presentada in Le Portel cun determina, mustrande dae sos primos minutos de podere cumpetere in manera chitta cun sos frantzesos.

Sa gara est bistada bilantzada in sas primas tres partes, cun sas duas isquadras chi sunt bistadas a su cumandu una fattu de s’attera chentza mai si che andare a daenanti. Sa terza parte si est serrada cun sos merese de domo a daenanti solu de unu puntu(61- 60), dassande suspentare una parte finale intzerta e chertadora.

In s’urtima parte, peròe, sun bessidas a pizzu sas difficultades de sos tattaresos, mescamente in s’attaccu. Mentres Le Portel at pottidu contare supra sas prestassiones istravanadas de Konate, Diawara e Nunge, sos tattaresos ant fatigadu a acciappare continuidade. A battoro minutos dae sa fine, sos frantzesos ant approffittadu de carchi sbeliu de sa deffensa de sa Dinamo po allonghiare.

Bell’ e chi custu, sa Dinamo no at mai molladu. Sos tiros de tres puntos de Veronesi e Fobbs, su menzus marcadore tattaresu cun 12 puntos, ant torradu a azzendere sas isperantzias de sos istranzos, chi sunt arrivados a -4 puntos. A donzi manera, in sos momentoz detzisivos, Le Portel at mustradu una frittesa e fortesa pius mannas, serrande sa gara cun su risurtadu de 83-76 conchistande duos puntos pretziosos in sa cursa po si qualifficare.

Mancari eppat perdidu, sa Dinamo at mustradu signales de corazzu. S’isquadra at gherradu a sa chitta contra unu cuntrariu de livellu artu, evidentziande tramas de giogu bonas e impignu mannu, ma est mancada, in sos momentos pius importantes, una cosa supra sa cale coach Markovic at a teppere tribagliare. Sa fase de s’attaccu in s’urtima parte de sa gara, in manera particulare, at evidentziadu una mancantzia de lutidade, mentres in sa defensa si sunt bidas mancantzias chi ant permittidu a sos frantzesos de approffittare de situassiones de favore.

Cun duas derrottas in duas garas, sa Dinamo est como in d’una posissione cumplicada , ma su caminu po passare sa muda benidora no est cumpromissu. Ant essere de fundamentu sos impignos pius accurtzos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22