In Valledoria est bistadu accraradu unu casu suspettu de Frebba de su Nilu Occidentale. Sa divisione de prevensione veterinaria de sa ASL de Tattari, responsabbile de sas operassiones de controllu e custodia de s’iscrocca, at mandadu campiones pigados dae una corronca acattada morta in sas campagnas de Tamarici, a su Tzentru de notissias natzionale de Teramo.

Sa Frebba de su Nilu Occidentale est una de sas maladias ammormantes trasmittidas dae sas tzinzulas, chi sunt su portadore printzipale de su virus. Su virus addurat in s’aera gratzias a una filera chi appartennet mescamente a sas tzinzulas e sos puzzones arestes, cun sas tzinzulas chi trasmittint su virus a sos puzzones e dae sos puzzones a sas tzinzulas.

Custu giru, permittit a su virus de sighire in su tempus e passare in atteros logos.

In s’omine, s’infetzione dae virus de su Nilu Occidentale non tenet signales in s’80 po chentu de sos casos. Medas pessonas malaidas non mustrant nissunu signale e duncas non si rendent contu de essere malaidas. Bell’e chi, carchi rara borta, s’infetzione podet diventare pius grave, mescamente in mesu de sos bezzos o cussos chi tenent deffensas
cumprumittidas. In custos, su virus podet cajonare signales a sos nerbios e atteras cumplicassiones graves.

Sos signales pius graves de sa Frebba de su Nilu Occidentale, si abberguant in pius pagu de s’1% de sos malaidos. Custos signales podent incluire frebba arta, dolores de conca fortes, debilesa de sos musculos, disorientamentu,tremula e istorbos de sa vista. In carchi casu, sas cumplicassiones podent essere pius graves, battinde maladias a sa conca e puru sa meninzite, cunditziones chi dimandant curas lestras e podent tennere cunseguentzias po meda tempus.

Sa custodia e su controllu de sa Frebba de su Nilu Occidentale, sunt de fundamentu po prevennere sa diffusione manna de sa maladia e diffendere sa salude prubbica. Sas autoridades locales de sa sanidade, commente s’uffitziu de Prevensione veterinaria de sa ASL de Tattari, tenent unu rolu inportante meda po assebertare a sa lestra sos casos suspettos e po dare rispostas adattas. In su mentres chi arrivan sos risurtados de sos test mandados a su Tzentru de informatzione natzionale de Teramo, est essentziale tennere s’attentzione arta e leare misuras de prevensione.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22