Sos incantos de sa Sardigna, si ammaniant a accollire un’aundada chene cabidianu de interessu dae parte de agentzias internassionales ismastridas in su turismu de isposonzos de isfartzu.

S’isula de su Mediterraneu, si ammanitzat a abberrere sas giannas suas a una caravatza de spertos de su campu, chi arribant dae donzi parte de su mundu, cun attentzione particulare a sos Istados Unidos, a s’India e a su Mesu Oriente, in d’unu viaggiu chi ammaghiada, connoschidu commente Soulstir Trip, chi at incumintzare in su mese de Cabidanni.

Su primariu intentu de custu viazzu abbenturosu est cussu de acciappare s’immaginassione de sas parigas chi arribant dae tottu su mundu, cumbinchindelas a seperare sa Sardigna commente su logu po tzelebrare sa die pius importante de sas vidas insoro. Custu disignu audissiosu est naschidu dae sa partezipatzione de su frimmu disignu Love is Wedding e s’initziativa Say Yes in Italy, ambos impignados a favoressere sas estremadias italianas in su campu de sos isposonzos internatzionales.

Su SoulStir Trip promittit de essere una carraffale esperientzia, un’abbentura fundada supra s’iscoperta de sa natura innida, supra sas tradissiones de sa coghina, s’arte e sa posada unica, chi solu s’isula sarda ischit apparare. At essere un’occasione de non perdere po si tuffare in sas situassiones incantadas de unu logu, inube su passadu si fundet in
manera armuniosa cun su presente, creande iscenas chene tempus po sa die pius carraffale po una cropa.

Ma non sunt solu sas biddas de su Mesu Oriente a essere allibradas dae sas curnisas ispettaculares chi sa Sardigna podet apparare po un’isposonzu de sonniu. Sos Istados Unidos e s’India, in manera particulare, ant mustradu un’interessu chi est creschinde po sos isposonzos in s’Isula. Sas agentzias chi arribant dae custas biddas, battint
un’esperientzia manna in s’ordiminzu de isposonzos de isfartzu, chi resessint a isposare in manera perfetta, tradissione e modernidade, apparande in custa manera a sas cropas, un’isperientzia chi non si podet ismentigare e chi at addurare imprentada in sos coros insoro po totta sa vida.

S’agentzia indiana, in manera particulare, si annoditat po s’abilidade de sighire donzi elementu, dae sa cussoria particulare sighinde cun decorassiones reffinadas, creande unu logu prenu de maghia, chi incantat sos isposos e sos istranzos insoro. Cun d’una cura pretzisa de sos elementos e un’attentzione chene cunfruntos a sas esigentzias de sos isposos, custas agentzias tenent su compitu de trasformare donzi isposonzu in d’unu abbenimentu carraffale,
unu momentu de bellesa pulida e felicidade cun sa Sardigna commente isfundu chi che bogat s’alenu.

Po congruire, s’imbasione de sas agentzias internatzionales ismastridas in su turismu de isposonzos de isfartzu, est un’opportunidade unica po sa Sardigna, de mustrare a su mundu sas bellesas suas de sa natura, cultura
e de su mandigu cunfirmandesi semper de pius, commente unu de sos logos pius chircados, po chie sonniat un’isposonzu de contassia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su decretu Energia a unu passu dae su emmo  allisat sa carrela a s’imbestida de su bentu; Sardigna chentza amparu.

Su decretu Energia est accanta a s’approazione deffinitiva. Pustis de su via libera de su Senadu, su provvidimentu at arribare in pagu tempus a
sa Camera po s’urtimu passazzu de su parlamentu chi at a cussentire s’approazione. Unu camminu chi est faghinde preoccupare meda sa Sardigna
inube creschet sa timoria de un’accreschimentu chentza controllu de sos impiantos de su sole e de su bentu, chentza chi bi siant tutellas po s’iscrocca.

Su decretu, naschidu po apprettare sa colada energetica e minimare sa dipedentzia dae su fossile benit bidu commente un’istrumentu chi minimat su rolu de sas Regiones e de sos entes locales favoressinde Operadores Energeticos mannos natzionales e internatzionales. Sa Sardigna, gratzias a sas calidades de s’ambiente e de su tempus benit cussiderada una de sas iscroccas prus disizzadas po imbestimentos novos e propriu po custu arriscat de tennere sos problemas prus mannos.

Sas regulas novas prevedint protzeduras prus fatziles po s’autorissasione e una minimada de sos controllos locales. Custu diat podere cussentire sa fraigada de impiantos fintzas in logos cun balore mannu de sa bista de sa laurantza cun effettos devastantes supra s’iscrocca e sas comunidades.

In custu cuntestu si affortigat s’impignu de comitados tzivicos, amministradores locales e assotzios chi dimandant istrumentos de amparu prus balidos. A su tzentru de sa dibatta bi est sa proposta de una lezze regionale Pratobello chi puntat a introduire lacanas craras e criterios chi istringhent de prus po fraigare impiantos po su sole e su bentu in s’Isula.

In sas dies imbenientes cun s’accostiare de su votu a sa Camera si prevedint initziativas novas e protestas pubbricas. Su cunfrontu si giogat intre s’esigentzia natzionale de apprettare sa transizione energetica e sa dimanda de prevedire unu disignu chi tenzat contu de sa particularidade de sa Sardigna e de sa tutella de su patrimoniu naturale e culturale suo.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22