Dae Casteddu est partida s’abbentura noa de Carlo Coni, 47 annos, chi si ghettada po sa secunda borta in su disaffiu de girare a inghiriu de sa Saridgna a sa sola, supra de su Kayak sou.

Unu truppa manna de sustenidores si est affacchiadu custu manzanu in sa praja de su Poetto, a cara de Marina Piccola, po dare s’accottu insoro a Coni. Passadas dae pagu sas deghe, Coni est partidu, leande sa derettura de Villasimius, accumpanzadu po unu trettu dae atteros appassionados supra sup e barchittas e dae una barca manna de su Corpu Forestale.

Custu giru de sa Sardigna, chi at a sighire su perimetru de s’isula girande a manca, at a durare casi unu mese, a sigundu de sas conditziones de su tempus e de su mare.

“Ammos tribagliadu in manera tosta po arrivare a custu puntu”, at ispiegadu Coni. ”Ammos istudiadu donzi elementu cunfidande in s’esperientzia nostra de s’attera borta. Cherzo narrere gratzias a tottus sos chi, amigos e chie at dadu sa disponibilidade sua, ant crettidu e sighint a creere in custu disignu e chi ant dadu unu contribbudu po la podere abberare.

In su 2018, partinde issu puru dae Casteddu, Carlo Coni est resessidu po sa prima borta in s’incumintzada, accabbande su giru de s’isula pustis de 35 dies de viazzu e pius de milli kilometros attraessados. “Oe est unu die importante, pro itte cumintzat fintzas su disignu ecologico-educativu “Tottus in sa mattessi barca”, at nadu Coni.

“S’impignu sou est cussu de indilighire sas pessonas supra de su rispettu e sa protessione de su nodidu
ambiente nostru de s’isula. Sa connoschentzia de custa initziativa, chi si at a tennere in su mentres de sa navigassione, cun dies dedicadas a sa mundadura de sas costas e sas campagnas nostras, est su motivu printzipale chi mi at ispintu a torrare a faghere s’esperientzia de su 2018.

“Tottus in sa mattessi barca” naschet dae sa volontade de derettare s’attentzione supra su tema de sa tutela de s’ambiente, chi est importante meda po sa Sardigna.

Est bistada ordiminzada una passizzada ecologica po regollere s’arga lassada in sa costa, cuncentrandesi supra su bidru, sas lammas e sa plastica, cust’urtima considerada una de sas minettas pius mannas po s’ecosistema de su mare. Sas operas de mundadura sunt bistadas fattas in sas costas de Casteddu e Quartu Sant’Elena, poninde attentzione particulare a sas alas de su Poetto, Calamosca e Sant’Elia. Sas attividades ant a sighire secundu su calendariu chi si podet biere in su situ web de su disignu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ulassai si preparat a sa Biennale de arte de custos tempos.

Ulassai si preparat a accasazare un’edissione nova de sa Biennale de arte de custos tempos, un’addobiu culturale chi in sos urtimos annos est assuminde unu rolu semper prus importante in sa bista artistica de sa Sardigna. S’abbenimentu at a partire su 21 de martu, revertinde pro paritzos meses sa bidda ozzastrina in d’unu logu de addobiu pro artistas, istudiosos, appassionados e bisitadores chi arribant dae donzi parte de s’isula e non solu.

Mustras, istallatziones, addobios e mamentos de cunfrontu ant a animare sos logos de sa bidda, apparande a su pubbricu s’occasione de si accostare a s’arte de custos tempos e de iscoperrere limbazos creativos novos. Sa Biennale est dedicada a sa frigura de Maria Lai, una de sas prus importantes artistas italianas de su Noighentos e ligada in manera funguda a sa terra sua de issida. Ulassai est difattis sa bidda in sa cale s’artista est naschida e inube at dassadu unu signu forte meda pro mesu de paritzas operas chi negossiant cun sa bista e sa comunidade.

S’edissione de su 2026 de sa Biennale at a tennere comente tema sa lettura de un’opera de arte. S’intentu est cussu de cumbidare su pubbricu a abbaidare sas operas cun meda prus attentzione, chircande de cumprendere sos signifficos e sos nuntzos. Sa derettura artistica de s’abbenimentu est intregada a Gianni Murtas,
cun sos curadores istranzos Giannella Demuro, Ivo Serafino Fenu e Francesca  Sassu. Su tribagliu insoro at giuttu a sa creatzione de unu programma chi ponet impare artistas e operas capatzes de faeddare cun s’iscrocca, cun s’istoria de sa bidda e su pensamentu artisticu de Maria Lai.

A sa Biennale ant a partetzipare prus de vinti artistas chi arribant dae tottue, donzunu cun su propriu limbazu e sa propria chirca. Sas operas ant essere ispartas in paritzos logos de sa bidda, non solu in logos museales ma fintzas in atteros logos culturales e in carchi zura in fora.Custu at a permittere a sos bisitadores de iscoperrere Ulassai: sa Biennale est fintzas un’occasione importante po balorizzare s’iscrocca de s’Ozzastra e favoressere su turismu culturale.

Manifestassiones comente sa Biennale mustrant comente sas biddizolas potant divennere logos de interessu culturale mannu cando resessint a balorizzare s’identidade e su patrimoniu propriu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22