Seui, comune pitticcu chi at fattu parte de sa Tzittade Metropolitana de Casteddu, at dae pagu annuntziadu s’intrada sua in s’Ozzastra, dassande sa provintzia de prima.

Custu signifficativu cambiamentu est bistadu su risurtadu de unu referendum chi si est fattu s’atteru die, chi at bidu una partetzipazione manna, cun su 63% de sos chi podiant votare chi ant dezisu de bi andare.

In tottu su manzanu, sa partezipatzione a su referendum est bistada custante, cun d’unu ritimu chi at fattu binchere sa maggiorantzia a sas ses de sero, cando giai 478 tzittadinos aiant dadu su parrere insoro. Custu numeru superaiat su 33% de sos chi teniant dirittu, sigundu sa disposta de su regolamentu de su comune, bogandeche a fora sa quota de sos chi istana in s’estero.

In sa die, su numeru de sos votantes est sighidu a pigare, accattande a sa fine, su numeru de 634 pessonas.

Su seberu de s’Ozzastra, at alcansadu unu accottu chi at ammatziadu, cun su 77% de sos chi ant votadu, chi ant seberadu po custu cambiamentu de iscrocca. Su sindigu de Seui, Fabio Moi, at cummentadu su sutzessu de su cussizzu cun d’una noda, poninde in evidentzia s’importantzia de sa partezipatzione de sa zente commente unu istrumentu essentziale de sa democratzia po leare detzisiones commente custas.

“Misurare su sentimentu de appartennentzia a unu particulare zassu est bistadu fundamentale e su risurtadu, chi niunu si apettaiat cun custa differentzia, at mustradu cantu est importante iscurtare sa boghe de sa comunidade, po mesu de istrumentos commente su referendum” at nadu Moi. At puru nadu chi est importante meda su rispettu de sas bideas de sa popolatzione, pro itte donzi contribbudu e donzi idea sunt pretziosas po leare sas detzisiones.

Su sindigu at congruidu ringratziande tottu sos chi ant partetzipadu a su processu de su referendum, evidentziande s’importantzia de unu faeddu abbertu e rispettosu intro de sa comunidade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22