In Ozzastra, bi est unu segretu, custoidu cun amore e rispettu dae ingendras: sa vida longa. E po un’attera orta, sa comunidade pitticca meda de Biddamanna Strisaili at mustradu a su mundu intreu de essere unu logu riservadu de vida e vivesa, tzelebrande unu accadessimentu ispantosu: sos 104 annos de Tiu Mario Firinu, un’ommine chi at bividu 104 annos.

In su die ispantosu in su cale at istudadu sas suas 104 candeleddas, carchi die faghede, Mario est bistadu arrodadu dae s’affettu de sos amados suos e dae sos amigos de una vida. S’arrisu sou luminzosu e s’allegria sua appitzigaditta ant rendidu s’ambiente puru pius distintu, trasmittinde unu sensu de ingraenza e de connessura arta cun su passadu e su presente.

Naschidu in su 1920, Tiu Mario incarnat s’allegria e sa maduresa de una ingendra chi at bidu su mundu cambiare sutta de sos oggios suos. Sa presntzia sua est unu faru de gentilesa e de calore umanu, accollinde tottu cussos chi si accostana cun d’unu coro abbertu e un’animu generosu. Bell’e chi sos annos siant passande, sa mente sua est lughida e lestra a cundividere sas memorias pretziosas suas de una vida ricca de abbenturas e de emossiones.

Affundadu in sa bellesa chenza tempus de sa terra sua, Tiu Mario, contat cun galabera sas istorias de unu tempus attesu meda,cando sas dies passaiant lentas e sos addobios fint fattos de semplicidade e autentighidade. Sas paraulas suas sunu unu ponte chi collegat sas ingendras, carrande chie iscurtat in d’unu viazzu in mesu de sos ammentos de una simana passada, ma chi non si est ismenticada mai.

Ma su chi rendet ispantosu abberu Tiu Mario, non est solu s’edade sua avantzada, ma sa capacidade sua de bivere onzi momentu cun ingraenza e allegria. Bell’e chi sas isfidas e sas cuntrariedades chi at addobbiadu in su camminu sou, s’ispiritu sou est adduradu ischittu e chi non si ruinzat, unu esempiu lughente po tottu cussos chi tenent su mandu de lu connoschere.

E gai, mentres Biddamanna Strisaili si colorat de festa e de allegria, po tzelebrare sos 104 annos de Tiu Mario, su mundu intreu s’inchinat de fronte a un’omine carraffale chi est su menzus de s’umanidade nostra. Sa vida sua est una tassa a sa fortesa, a sa gentilesa e bellesa de sa semplicidade, unu faru de isperantzia e de ispirassione po sas ingendras chi ant a bennere. Chi su arrisu sou sigat a allugare su camminu nostru e chi sa maduresa sua nos ghiat in sas carrelas de sa vida, pro itte Tiu Mario Firinu est pius de unu de chent’annos, est una prenda pretziosa chi custoimmos in su coro po semper.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22