In Ozzastra, bi est unu segretu, custoidu cun amore e rispettu dae ingendras: sa vida longa. E po un’attera orta, sa comunidade pitticca meda de Biddamanna Strisaili at mustradu a su mundu intreu de essere unu logu riservadu de vida e vivesa, tzelebrande unu accadessimentu ispantosu: sos 104 annos de Tiu Mario Firinu, un’ommine chi at bividu 104 annos.

In su die ispantosu in su cale at istudadu sas suas 104 candeleddas, carchi die faghede, Mario est bistadu arrodadu dae s’affettu de sos amados suos e dae sos amigos de una vida. S’arrisu sou luminzosu e s’allegria sua appitzigaditta ant rendidu s’ambiente puru pius distintu, trasmittinde unu sensu de ingraenza e de connessura arta cun su passadu e su presente.

Naschidu in su 1920, Tiu Mario incarnat s’allegria e sa maduresa de una ingendra chi at bidu su mundu cambiare sutta de sos oggios suos. Sa presntzia sua est unu faru de gentilesa e de calore umanu, accollinde tottu cussos chi si accostana cun d’unu coro abbertu e un’animu generosu. Bell’e chi sos annos siant passande, sa mente sua est lughida e lestra a cundividere sas memorias pretziosas suas de una vida ricca de abbenturas e de emossiones.

Affundadu in sa bellesa chenza tempus de sa terra sua, Tiu Mario, contat cun galabera sas istorias de unu tempus attesu meda,cando sas dies passaiant lentas e sos addobios fint fattos de semplicidade e autentighidade. Sas paraulas suas sunu unu ponte chi collegat sas ingendras, carrande chie iscurtat in d’unu viazzu in mesu de sos ammentos de una simana passada, ma chi non si est ismenticada mai.

Ma su chi rendet ispantosu abberu Tiu Mario, non est solu s’edade sua avantzada, ma sa capacidade sua de bivere onzi momentu cun ingraenza e allegria. Bell’e chi sas isfidas e sas cuntrariedades chi at addobbiadu in su camminu sou, s’ispiritu sou est adduradu ischittu e chi non si ruinzat, unu esempiu lughente po tottu cussos chi tenent su mandu de lu connoschere.

E gai, mentres Biddamanna Strisaili si colorat de festa e de allegria, po tzelebrare sos 104 annos de Tiu Mario, su mundu intreu s’inchinat de fronte a un’omine carraffale chi est su menzus de s’umanidade nostra. Sa vida sua est una tassa a sa fortesa, a sa gentilesa e bellesa de sa semplicidade, unu faru de isperantzia e de ispirassione po sas ingendras chi ant a bennere. Chi su arrisu sou sigat a allugare su camminu nostru e chi sa maduresa sua nos ghiat in sas carrelas de sa vida, pro itte Tiu Mario Firinu est pius de unu de chent’annos, est una prenda pretziosa chi custoimmos in su coro po semper.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22