In mesu de s’iscuridade de su bisestu de s’Olocausto, una figura prena de corazzu e de bonu coro, sa monza Zuseppina Demuru, ada dae pagu retzidu su titulu onorevole meda de “Zusta in mesu de sas Nassiones” dae su Yad Vashem, s’organismu de Israele chi premiada cussos chi ana arriscadu sa vida insoro po sarvare sos zudeos, in su tempus pius iscuru de s’istoria de sos omines.

Sa nova de custu ondrosu riconnoschimentu est arrivada a sos nepotes de sa monza Zuseppina, cun d’una littera chi est arrivada dae Gerusalemme, su 14 de Nadale de su 2023. Sa littera, non solu abbisaiada chi li aiana assegnadu su titulu, ma finzasa chi su numene sou, l’aiana iscrittu po semper in su muru de sos zustos de Gerusalemme, unu riconnoschimentu chi ada addurare po sempere, po su sacrifitziu nobbili sou.

Sa tzerimonia de reconnoschida l’ana a faghere in sos meses pius accurzos in s’imbassada de Israele in Roma, inue sos nepotes ana a retzire una medallia e unu attestadu in onore de sa famada tia insoro.

Sa monza Zuseppina Demuru est diventada sa sesta femina sarda a retzire custu riconnoschimentu, poninde in evidentzia su corazzu e su bonu coro chi ada mustradu cando bi fini bistadasa sas pessecussiones cuntra sa zenia e sa Resistentzia. S’istoria sua si est connoschida gratzias a su contributu de Tonino Loddo, chi ada iscrittu unu libru pubblicadu in su 2017, supra Istudios Ozzastrinos.

Naschida in Lanusè, su duos de su mese de Sant’Andria de su 1902, sa monza Zuseppina si fidi unida a sa Cungregatzione de sas Fizzas de sa Caridade, cando teniada solu deghennoe annos. S’impignu sou po sos atteros si est bogadu a campu in manera garroffali, cando in su 1942 fidi diventada sa cumandante de su bratzu femininu de sa presone le Nuove de Torino, cando bi fidi s’occubassione de sos nazifascistas. In cussu tempus, creschiada sa pessecussione cuntra sa zenia, e sa Monza Zuseppina,si fidi annodditada pro itte aiada diffendidu e cuadu deghinas de ebreos e partigianos in sa presone, faghinde diventare pagu sigura fintzas sa vida sua, po nde sarbare medas atteras.

Sa morte sua in su 1965 no ada iscantzelladu s’eroismu sou dae sa memoria de tottus. Su comunu de Torino, ada onoradu sa memoria sua, cun d’una accorrada de su cunsizzu comunale e ada dedicadu una iscola Materna in sa bia Lessona, a custa femina garroffala chi ada cumproadu abbastu chene cunfrontu in sos momentos pius buggios de s’istoria.

A dies de oe, gratzias a su riconnoschimentu chi li ada dadu su Yad Vashem, sa monza Zuseppina Demuru, benidi ammentada, no solu in Torino, ma fintzas in paritzas tzittades de sa Sardigna. Manifestatziones po sa Die de sa Memoria, organizzadas dae sa sotziedade Oleaster, si ana a faghere in sos comunes de Bari Sardu, Baunei, Turtulia. Tonino Loddo e sas chi dirigini sas bibliotecas, ana a partetzipare po accasazzare custa femina sarda, chi ada incarnadu s’ispiritu beru de umanidade in sos tempos pius buggios de s’istoria. S’istoria sua ada addurare una lughe de isperantzia po sas ingendras chi ana a sighire.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna contra sas macchissias in Gaza: proposta po suspendere sa cooperatzione cun Israele.

Sa presidente de sa Regione Sardigna, Alessandra Todde, partetzipat cun determina e craresa supra su diligu atzocchiu chi bi est in Gaza, poninde supra de sos social sa proposta depositada deris in Cunsizzu regionale e firmada dae casi trinta cunsizzeris de sa majoria.

Su documentu , chi est bessidu a pizu pustis de unu cunsensu internu , dimandat in manera uffitziale a sa Regione de cundennare sas violatziones de sos dirittos umanos in sa tzira de Gaza e de leare mesuras tzertas, intre sas cales sa suspensione de donzi forma de cooperatzione cun s’Istadu de Israele, fintzas a cando no at essere torradu a essere rispettadu du dirittu internatzionale e sos dirittos fundamentales.

Alessandra Todde at cherfidu ammentare comente sa Sardigna si siat giai espressada in manera crara e detzisa in su tempus passadu po su reconnoschimentu de s’Istadu de Palestina. In manera particulare, at evidentziadu comente su Cunsizzu Regionale eppat aderidu a sa positzione de pius de 140 istados chi faghent parte de sas Natziones Unidas, reconnoschinde in manera uffitziale sa Palestina comente Istadu soberanu. Custu passu, importante meda a livellu de cona, no si est alindadu a addurare supra su pabilu, ma si est traduidu in assiones importantes dae parte de sa Regione. Diffattis, sa Sardigna at poderadu in su tempus, paritzos disignos de cooperassione cun entes e organissassiones tzviles de sa Palestina chi si cuntzentrant supra campos istrategicos e vivos comente s’ambiente, sa salude e s’istrussione.

Sa presidente Todde at pustis evidentziadu comente, mancari custos importantes resuratdos, siat arrivadu su momentu de faghere un’atteru passu chi siat detzisivu. Sa Sardigna no podet e no si deppet bortare dae s’attera parte in daenanti de sa gravidade de sos abbenimentos chi si sunt cossumande in tzira de Gaza. Est de fundamentu, at evidentziadu, chi sa Regione pichet una posissione crara e chentza dudas, chi andet addia sa simple issida de solidariedade, ma chi si bortet in d’una posissione politica e istitutzionale bera.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22