S’urtima puntada de su programma televisivu “Alessandro Borghese 4 ristorantes”, registradu carchi mese faghede e trasmittidu po sa prima orta supra de Sky e cun su streaming in su canale Now, dominica 14 de ennarzu 2024, nos ada fattu iere s’Ozzastra incantada, in sa costa orientale de sa Sardigna.

In s’urtima puntada su coghineri Alessandro Borghese, ada conduidu sos ispettadores in d’una bera ispegulizada de sos mandigos, bintrande intro de sa traditzione de sa gastronomia de sa regione nostra. Custu viaggiu c’ada leadu Borghese a assazzare tottu sas cosas bonas de sos battoro ristorantes ozzastrinos, onzunu cun sa proposta sua unica e sa caratteristica chi lu faghet connoschere.

Sos chi ana intzidadu a su disaffiu, fini battoro prendas de sa cosa de mandigare: “Sa cadrea” de propriedade de Emanuela in Santa Maria Navarrese, chi ada delissiadu cun prattoso de su connottu presentados in manera moderna e cun d’unu panorama chi che ogada s’alenu, supra su mare; su ristorante Abba E’Murta”, dirigidu dae Carla, affundadu in sa natura, chi ada preparadu una coghina simple e sinchera in d’unu ambiente mangone; Al Porticciolo de Frantzisca, ispecilizzadu in coghina mediterranea de pische, assentadu in su portu pitticcu de Arbatax, cun d’una suttea chi si accarada supra de su mare; e “Incontro di Vino”, de Teresa, accosta a su purtu de Tortolì, chi ada preparadu una coghina de sa tradissione chenza arrepiccoso.

Sas regulasa de custa cumpetissione sunu adduradasa sas mattessi: sos battoro ristoradorese si sunu disaffiados po conchistare su titulu de su menzus in d’una categoria dillindada. Sa valutazione de su famadu coghineri Borghese, alcansaiana sa limpidoria de sa coghina, e su servitziu in su pastu, e in su mentres sos atteros ana dadu sos votos a sos pratos, a sos ristorantes, a su menu, a su servissiu e a cantu toccaiat de pagare. Un’atteru disaffiu ada postu in pare tottas battoro sos cuncorrentes, po si cunfrontare supra unu prattu chi aida fattu connoschere s’iscrocca, cun sos culurgiones chi sunu bistados sos prus importantes chenza nisciuna
duda.

A sa fine de tottu, su ristorante “Sa cadrea” ada binchidu, arrivande primu. Segundu est arrivadu S’Abba E’ Sa Murta”, sighidu dae “Incontro di Vino” e “Il porticciolo” urtimu.

In tottu sa puntada bi sunu bistados meda momentos chi no si podene malograre, ma nois prefferimmos non bos bogare a campu troppu, pro non bos arruinare s’ispantu, si mancari cheridese recuberare sa puntada. Bos augurammos una visione bona e de bos godire s’emossione de su mundu de sa coghina de s’Ozzastra.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Unu viàziu piticu intre sos Binos Sardos Prus Nodidos.

Sa Sardigna est una de sas regiones de binàrias prus ammaghiantes de Itàlia, un’ìsula dae s’istòria millenària in ube su binu nàschet dae su faveddu continu intre mare, bentu e terra. Sos binos sardos prus nodidos sunt s’issida berà de cust’iscrocca ùnica e de sas variedades suas autoctonas, meda de sas cales non esistint in àteros logos.

Su prus famadu est su Cannònanu de Sardigna, ruju sìmbolu de s’ìsula, ispartu mescamente in Barbàgia e Ozzastra, connottu pro s’istruttura sua, sos nuscos de frutos rujos maduros, ispètzias e mata mediterrànea e pro su ligàmene cun sa bezzesa de sas populatziones locales. Intre sos biancos si annodittat su Vermentinu de Gaddura DOCG, s’ùnicu binu sardu a denominatzione de orìgine controllada e garantida, friscu, sapidu e nuscadu, nàschidu in un’iscrocca granìtica e bentosa chi dd’at donadu elegàntzia e mineralidade.

In su sud-ovest de s’ìsula s’affirmat su Carignanu de su Sulcis, a bortas contipizadu subra de bìnzas antigas a arboreddu a curtzu a su mare, unu ruju cadriu e modde, cun tanninu galanosu e cun nuscos de fruta iscura e ispètzias. Meda difùndidu in su tzentru-sud est su Monica de Sardigna, unu binu traditzionale, pagu tànnicu e de buffada fàtzile, cun nuscos de cariasa e frores, ideale pro sa coghina de donzi die.

Intre sos biancos istòricos bi est su Nuragus de Casteddu, una de sas variedades de vide prus antigas de s’ìsula, forzis introdùida dae sos Fenicios, chi donat binos lèbios e friscos, ligados a su connottu de sos massajos. Prus cumpressa e delicada est sa Malvasia de Bosa, prodùida in s’adde de su Temu, unu binu aromàticu chi podet èssere siccu o durche, cun notas de frores, de mendùla e mele, figura de una produtzione artesana de balore mannu.

Unu casu ùnicu in su panorama italianu est sa Vernàccia de Aristanis, binu biancu ossidativu afinuadu suta unu velu de frementu, cadriu e fungudu, cun nuscos de fruta sica, ispètzias e mendùla ranchida. A costazu de custos nùmenes istòricos cumparint variedades comente su Bovale, o Muristellu, chi dat binos fraigados e potentes, e su Torbadu de L’Alguer, variedade rara torrada a agatare in sos ùrtimos annos, capatze de espressare biancos elegantes, friscos e minerales.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22