S’orgogliu de sa Sardigna in s’Antardide: su chircadore Marco Buttu, faghede isbentulare sa bandela de sos battoro moros in sa base Concordia,in sa terra isperdida de s’Antartide.

Una bandela de sos battoro moros in s’Antartide. L’han fatta pigare in artu sos tres chircadores sardos chi sunu tribagliande in sa base internatzionale de s’istazione Concordia. Marco Buttu, chircadore gavoesu, ada contadu custu momentu particulare, poninde unu pensamentu sou supra de sos social, accumpanzandelu cun d’unu video e
finzas unu cunsideru.

Commente musica, una cantone meda connoschida de su gruppu rock thiniscolesu de sos Kenze Neke. Artziare una bandela, mi ponet in discumbeniu, pro itte faghede bennere in mente s’idea de su possessu, e finzas de s’occupazione de sos terrinos. Sa bandela de sos battoro moros, chi su primu die de s’annu isbentulada sutta su sole de mesanotte, in su logu prus bolantigu de su mundu, mi permittit de faghere unu auguriu generale a nois tottus, e unu in particulare a s’isula de sa cale so innamoradu, narat su chircadore.

Fatto s’auguriu chi sos pensamentos e sas cosas chi faghimmos nois commente umanos, siana sempre de pius indiritzados supra de s’idea de no tennere tenimentos.

Pensare a tennere sas cosas est su motivu printzipale de sos problemas nostros, de sa dema sotziale e de sas personas. Sos pitzinnos, propriu po sa possessividade, una de sas primarzas manifestaziones de s’ego,podene istrazzare sos giocos dae sas manos de sos cumpanzeddos. Sa possessividade incuminzat in custa manera e pustis diventat peus, cun sos pitzinnos chi diventana mannos e cuminzana a dividere su pianeta nostru poninde affrontaduras, faghinde cosas terribiles po ottennere atteros terrinos. S’auguriu chi fatto e tottus est de pigare in artu bandelas no po occupare terrinos, ma in manera de identificare culturas e areas zeograficas.

Semus totu paris, est beru, cantu est beru chi custu mundu podet essere arrosciu meda si bi esseret solu unu logu de biere e una manera sola de pensare, narat. Ispero de acciappare sa Sardigna vera commente l’appodassada, cun sos pitzinnos de sa Barbagia chi faeddant su sardu e su Supramonte areste. Tenzo gana de biere in su tempus benidore, pagos istabilimentos e meda pius prajas liberas, zente chi siat accogliente e chene Cunformismu.

Auguro a sa Sardigna de torrare a bivere un’attera Pratobello chi li diat libertade dae s’occupatzione militare e dae sas gherras finghidoras chi la prenant de bombas. Bonu 2024 e bona vida serena e in paghe cun su pranetta e tottu sos chi bi vivent e chi nos faghene cumpanzia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Carbònia, su Museo de su Carbone: unu viazu in sos tempos de sa memòria de su Sulcis de sas minas.

In su corizone de Carbònia, a intro de sa ‘idditzola de de Serbariu, b’at a dies de oe unu de sos museos pius de importu de sa Sardigna. Est su Museo de su Carbone, chi est dedicadu a s’istoria de sas minas. Est unu logu chi nos contat non solu s’istoria de cussu logu, ma fintzas sa vida de òmines e fèminas chi po annos e annos ant triballiadu in cussas minas.

Serbariu, inube si triballiaiat dae su 1937 a su 1964, fuit comente una funtana de abba semper bundante, inube sa zente si nche catzaiat su sìdiu de su tribàlliu. Est cussu su logu chi at batidu dinare meda a sa zona, ma puru energia manna a totu s’Itàlia. Su carbone de cussas minas, infatis, daiat tribàlliu a sas fàbricas, a sas tzentrales e a sas ferrovias, diveninde motore de modernizatzione industriale de totu sa natzione nostra.

Addaghi ant serradu sas minas, cussos logos pariat chi nos nche los depimus ismentigare, ca pariat chi non b’aperat abbarradu pius nudda. Invetze, b’ant fatu unu prozetu de recùperu e de valorizatzione manna, dande vida noa a totu cussos logos, chi sunt divènnidos unu museo chi, ancora a dies de oe, betat a pare sa memòria istòrica, sa didatica e sa capatzidade de divulgatzione.

Po chie andat a bìere custu museo, b’at paritzos zassos de visitare. B’est sa lampisteria, chi est su logu inube b’at una mostra chi est aberta totu s’annu e chi nos contat s’istòria de su carbone, de sa mina e de sos caragolos suos,ma puru de sa ‘idda de Carbònia, nàschida in su 1938 po retzire sas famìlias de sos triballiantes. Incue b’at unu muntone de làmpanas antigas chi si impreaiant in sas minas, ma b’at fintzas trastes e documentos, filmigheddos de sos tempos de tando fatos a sos triballiantes e puru intervistas fatas addaghi sa mina fuit zai serrada.

B’at puru fotografias meda de una bellesa rara. In custos caragolos e percolos chi nos permitint de atraessare sa mina, si podent bìere totu sos logos chi cada die sos minadores pupulaiant addaghi andaiant a triballiare. In sa sala Argani bi sunt poi totu sas màchinas chi permitiant su tribàlliu a tempos de tando.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22