In un’avenimentu istraordinàriu, chi paret ispiradu a su film famadu “Mama ho perso l’aereo”, est capitadu su 21 de nadale pro more de unu malintesu chi at interessadu unu pipiu de ses annos a nùmene Casper e sa cumpangia aèrea Spirit Airlines. S’intzidente at fatu lòmpere su piticu dae Fort Myers, in Florida, a Orlando, a una distàntzia meda prus manna de cussa programmada.

S’istòria cumintzat cun Casper, chi biagiaiat solu dae Fort Myers pro colare sas vacàntzias de Nadale cun sa mannai. Nointames, un’errore de imbarcu l’at indiritzadu a Orlando. Cando sa mannai s’est presentada a s’isportellu de sa cumpangia aèrea pro pigare in cunsigna su nebodeddu a printzìpiu  l’ant comunicadu chi Casper aiat pèrdidu s’aeroplanu. Petzi in unu segundu a pustis ant reconnotu s’errore e ant individuadu su pipiu a bator oras de distàntzia dae sa destinatzione originària sua.

Sa Spirit Airlines at propostu su rimbursu de su biàgiu, ma sa famìlia de Casper como est chirchende de cumprèndere comente siat istada possìbile una cosa comente a cussa. Sa mannai, Maria Ramos at pedidu crarimentos subra de sa protzedura chi at cunsentidu a su pipiu de s’imbarcare in su bolu diversu, nointames esseret in possessu de documentos regulares e suta sa supervisione de su personale de bolu. Nointames sa cumpangia aèrea asseguret chi su piticu est istadu pompiadu in deretura dae un’assistente de bolu, mancant galu sos particulares de custa istòria ispantosa chi pro fortuna est agabbada bene.

S’intzidente nde at pesadu una surra  de interrogativos subra sa seguridade e subra sos protocollos de sa Spirit Airlines. Su fatu,  sìmile a un’iscenegiadura tzinematogràfica, sighit a poderare s’atentzione subra de sa netzessidade de torrare a bìdere e afortiare sos protocollos de seguridade e sas protzeduras de controllu in sa gestione de sos passigeris, mescamente cando si tratat de biàgios de minores non acumpangiados. Sa Spirit Airlines, in s’ora, est obligada a dare un’acrarimentu detalliadu e trasparente subra su chi est acadèssidu, pro more de torrare a otènnere s’aficu de sos biagiadores e garantire chi casos comente a custu non torrent a capitare mai prus .

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22