Sa “Sèrie B” in Tàtari est galu unu faeddu chi medas faghent a mancu de nàrrere, pro s’ogrumalu. Nointames, osservende sa classifica e fintzas su giogu de s’iscuadra de su nord Sardigna, paret chi su brìnchidu de categoria siat devènnidu unu bisu possìbile.

Sa calidade de sa rosa de sa Torres est istada cunfirmada cun s’importante vitòria otenta in Pescara. Sos òmines de Greco ant derrotadu s’iscuadra ghiada dae su Zdenek Zeman in s’istàdiu issoro matessi, una vitòria chi at ispantadu a medas.

S’iscuadra tataresa como est in sa punta de sa classìfica, cun unu vantàgiu de ses puntos subra sos abrutzesos e su matessi dae su Cesena, cando chi custu ùrtimu tèngiat una partida de mancu. Tando, custu chi in passadu podiat pàrrere unu sonnu como s’est furriadu a unu progetu isportivu bene definidu e possìbile. Sa calidade de sa campagna de achistos est istada ladina giai dae s’istiu, ma su fatu chi su tzìrculu de fùbalu prus antigu de sa Sardigna como siat a tretu de cumpètere cun sas iscuadras prus cuotadas de sa categoria est una noa ispantosa.

Alessandro Masala, autore de su gol detzisivu contra su Pescara, at naradu: “Si semus sos primos no est pro de badas!”. Custas paràulas simpres faghent cumprèndere su momentu màgicu de s’iscuadra. Domìnigu chi benit, in su Vanni Sanna, sa Torres at a afrontare sa Spal, un’iscuadra a sa portada sua. Nointames, pro mantènnere custa filera de vitòrias, at a èssere de importu a abarrare cuntzentrados, mescamente in partidas chi podent pàrrere prus fàtziles, ca sa  seguridade meda diat pòdere un’inimigu malu pro un’iscuadra binchidora.

Cun su Casteddu in crisi, su Terranoa chi est torrende meda in segus e sa Dinamo Banco di Sardegna chi no est prus forte comente a unu tempus, sa marrania de sa Torres tenet meda prus importu.  Ruocco, Scotto e sos cumpàngios issoro diat pòdere iscrìere un’istòria ispantosa.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Emergèntzia pro Manuel Desogus: serbit azzudu pro su trazu mèicu in Sardigna

Dae sa Sardigna arribat un’apellu urgente e disisperadu pro torrare a domo Manuel Desogus, unu zòvanu de 38 annos naschidu in s’Ìsula, como coberradu in cunditziones graes, ma istabiles, in sa teràpia intensiva de s’ispidale Charité de Berlinu. Sa situatzione de su zòvanu, chi dae prus de dòighi annos bivet e tribagliat in Germània, est drammàtica e ponet a proa tosta sa famìllia, ancora sinzada dae sa pèrdida de sos genitores de Manuel.

Duos meses a como Manuel est istadu corpidu dae un’infetzione cardìaca grae meda chi at dannadu in manera irreversìbile duas valvulas de su coro. A custa cunditzione si est azzunta una ischemia, trombosi e àteras cumpricatziones chi ant fatu divennere su cuadru clìnicu crìticu meda.
Mancari sa gravidade, de sa situatzione sos mèigos cunsìderant istabiles sas cunditziones suas, ma su zòvanu s’agatat a tesu dae sa terra e sa famìllia
sua, cumpletamente solu a afrontare una batalla difitzile e ispramosa.

Ignàtzia, sa tia sua, est s’ incarricada de sa famìllia e at ispainadu s’apellu cun s’isperantzia de tennere solidariedade. Contat chi Manuel, sempre allègru e prenu de vida, non tenet prus sa fortza ne sas resursas emotivas e fìsicas pro accomettare custa proa a tesu dae sa Sardigna. Sa pèrdida de sos genitores at lassadu unu boidu mannu, e commo sos parentes prus istrintos sunt abarrados solu issos, cun su disìzu de pòdere èssere in costazos suos in unu mamentu gai delicadu e detzisivu pro sa vida sua.

A cumplicare meda sa situatzione bi est unu problema burocràticu de non pagu contu: a pustis de annos de traballu a s’esteru, Manuel non tenet prus un’assicuratzione sanidària ativa. Custu impedit a s’ispedale tedescu de coberrere sas ispesas de sas curas, faghinde divennere netzessàriu un’interventu istravanadu pro lu faghere torrare in Itàlia.

S’unica solutzione possìbile est de ordiminzare unu trazu mèigu amparadu, dae sa teràpia intensiva tedesca a sa teràpia intensiva in Sardigna, cun meigos ispetzializados chi siant capatzes de garantire s’azzudu de sa vida in su mentres de su biàziu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”