Torra un’episòdiu de violèntzia in un’istitutu iscolàsticu de sa Sardigna, ue unu genitore at agredidu un’insinnante de matemàtica de 56 annos. Sa càusa de custu episòdiu est istadu sa briga chi at domadu a su fìgiu , unu giòvanu istudiante de 16 annos, a pustis de s’èssere cumportadu male in classe.

Durante una letzione, su professore aiat torradu a cramare s’atentzione de s’istudiante pro more chi fiat tzarrende a totora in classe. Si trataiat de una curretzione ebbia, ma a dolu mannu, su giòvanu at rispòndidu isullende  s’insinnante in antis de lassare sa classe arrenegadu.

Pagu tempus a pustis, su pitzocu at mutidu su babbu, chi at individuadu su dotzente de matemàtica e l’at corfidu cun unu corpu de conca a sa cara.  Su professore at tentu bisòngiu de s’interventu lestru de su 118 e sunt arribadas fintzas sas fortzas de s’òrdine.

Siat su babbu de su giòvanu istudiante siat s’insinnante interessadu sunt istados leados a s’ospidale pro retzire sas curas netzessàrias. Sas fortzas de s’òrdine sunt como valutende sa possibilidade de denuntziare s’agressore pro lesiones, violèntzia e resistèntzia a pùblicu ufitziale.

Custu intzidente est a dolu mannu petzi unu de sos medas episòdios de violèntzia contra su personale dotzente in sas iscolas. Nointames, est importante a sutaliniare chi sos dotzentes sunt reconnotos comente  pùblicos ufitziales, cosa chi cumportat cunsighèntzias legales ispetzìficas pro cumportamentos chi  los ofèndent o los fitupèriant.

Su Còdighe Penale Italianu, a s’artìculu 357, definit su pùblicu ufitziale comente acussu chi esèrtzitat una “pùblica funtzione legislativa, giuditziària o amministrativa”. Custa definitzione s’àplicat fintzas a sos dotzentes cando acumprint sas funtziones issoro a s’internu de sas istitutziones iscolàsticas, cumpresos sos atòbios cun sos babbos de sos istudiantes.

Sa Corte de Cassatzione, cun sa sentèntzia n. 15367/2014, at torradu ispetzificare custa cualifica de pùblicu ufitziale pro sos insinnantes, estendende·la a totu sas fainas connètidas a s’insignamentu, cumpresos sos addòbios cun sos babbos.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Bisestu grae a Igrèsias: betzu abbuttinadu dae unu camiu in s’attraversamentu po sos pedones.

Unu bisestu grae in carrela at iscuttuladu eris manzanu sa tzitade de Igrèsias, cando un’òmine de 75 annos est istadu abbuttinadu dae unu camiu mentres traessaiat sa carrela in s’attraversamentu pro sos pedones de sa carrela de Venètzia. Su betzu est istadu luego azuadu e leadu in còdighe ruju a s’ispedale Brotzu de Casteddu pro more de sas fèrtas tentas, calicuna de sas cales grae in manera particulare.

Segundu sas primas novas, su bisestu est acontèssidu a manzanu tardu, ma sos motivos pretzisos sunt ancora de cumprendere. S’òmine, segundu testimonzos presentes, fiat traessende cun atentzione cando su camiu l’at collidu. Su corpu l’at ghettadu subra de s’asfaltu, causende-li fèridas chi si bidiant e fertas a conca.

Su agghiadore de su mezu, aggiorottadu, s’est firmadu luego pro dare azudu e abisare sos servìtzios de emergèntzia. In su logu sunt intervennidos cun lestresa sos agentes de sa politzia locale e sos carabbineris, chi ant serradu deretu una parte de sa carrela pro permìtere s’arrivu de sos succursos e garantire sa siguresa de sa zura. Pagu a pustis est arrivada un’ambulàntzia de su 118, chi bìdas sas cunditziones crìticas de su betzu, at dimandadu s’interventu de s’elissuccursu pro che lu leare cun lestresa a s’ispidale Brotzu de Casteddu.

Segundu su chi ant relatadu sos duttores, s’òmine at tentu unu corpu grae in conca e medas segadas in sas ancas. In su mamentu, sas cunditziones suas sunt graes meda e sos duttores sunt compudande sas cunditziones suas donzi mamentu. Sas fortzas de s’ordine sunt sighinde sas chircas pro cumprendere s’andamentu pretzisu de su bisestu, ascurtande testimonzos e controllande sos resurtados de sas registratziones vìdeu de sa zura. Non si podet escluire chi fatores comente sa lestresa de su mezu, sa visibilidade o sa distratzione pòtant àere dadu contribbudu a su bisestu.

Su bisestu at creadu preoccupatzione manna intre sos tzittadinos de Igrèsias, meda de sos cales ant ispainadu timoria subra de sa siguresa de sos pedones, subra de totu in zura punnadas dae betzos e pitzinnos.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”