In Sardigna, a pustis de su càvaru biaitu, si registrat como s’arribu de una àtera genia non indìgena, su bròmbulu pintulidau, originàriu de su Patzìficu. Custu fenòmenu pesat pessamentos subra s’impatu potentziale chi  diat pòdere tènnere subra  sa fàuna ìtica locale.

In  cabudanni, durante sas fainas de compudu pranificadas in s’àmbitu de su progetu Istrategia Marina, sos tècnicos de su Dipartimentu de Sàssari e Gaddura de s’ARPA Sardigna, cun su suportu logìsticu frunidu dae sa Capitaneria de Portu de Terranoa, ant fatu un’iscoberta ispantosa. Medas esemplares de Phyllorhiza punctuata (von Lendenfeld 1884), una genia de bròmbulu originàriu de su Patzìficu otzidentale, sunt istados individuados a su largu de sas costas de Terranoa. Custa medusa mutida in italianu “medusa a pois”.

Mancari sos primos sinnos de sa presèntzia de custa creatura in su Mediterràneu torrent a artziare a su 2009, in sos ùrtimos annos s’est bida una creschida esagerada. Custu si pensat pro more chi su bròmbulu at agatadu un’ambiente favorèvole in sos mares nostros. Sa mannia de custa genia podet lòmpere fintzas sos 60 cm de diàmetru. Nointames, est importante notare chi custa medusa non rapresentat una minetza direta pro sos bagnantes, pro more chi no abrùgiat cando intra in cuntatu cun sa pedde. A su contràriu, donat  pessamentos pro sa comunidade ìtica locale.

Custas abbistadas sunt acontèssidos in su cuntestu de sas operatziones de rilevamentu e campionamentu prevìdidas dae su Descritore 2 de s’Istrategia Marina, chi si cuntzentrat subra s’identificatzione de mesches no indìgenas, sas gasi naradas NIS (No-indigenous species). Custu tipu de compudu est importante in sas àreas cun tràficu navale internatzionale mannu, ca b’est s’arriscu cuncretu de introduire mesches alienas in ecosistemas marinos sensìbiles.

Sa presèntzia semper prus fitiana de sa medusa de su Patzìficu e de su càvaru biaitu in sas abbas sardas torrat a pònnere in evidèntzia s’importu de s’ecologia marina e a s’importàntzia de compidare cun atentu s’ecosistema marinu pro amparare sa biodiversidade sua.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22