Duos tzinesos, un’òmine de 38 annos e una fèmina de 55 annos, originàrios de sa Mongòlia Interna, sunt istados arrestados in Tzina a pustis de un’atu grave chi at causadu dannos sena rimèdiu a unu de sos giassos istòricos prus importantes de su mundu: sa  Muràllia Manna. Su motivu? Su de creare un’iscortzatorju pro cròmpere prus asa lestra a su postu  de traballu. Custu fatu est sa proa chi sa presse podet portare a cunsighèntzias dannosas a beru!

Custos operajos ant isgavadu un’istampu de 5 metros in sa Grandu Tzinesa, un’istrutura chi dae su 1987 est istada reconnota comente  patrimòniu mundiale dae s’Unesco. S’acusa in sos cunfrontos issoro est in grave meda: “disacatos irreversìbiles a s’integridade de sa Muràllia Ming e a sa seguridade de sos benes culturales.”

S’intzidente s’est averguadu in unu cantiere  in sa contea de Youyu de Shuozhou, in sa provìntzia de su Shanxi. Custa setzione particulare de sa Muràllia Manna est sa de trintaduos e est istada fraigada durante sa dinastia Ming. Sos duos operajos diant àere abertu custu istampu pro more de fàghere colare s’escavadore e lòmpere prus a sa lestra su postu de traballu issoro.

Sa Muràllia Tzinesa est una de sas meravìllias architetònicas prus famadas de su mundu e est istada fraigada dae su 220 a.C. belle finas a sa dinastia Ming in su 1600. Durante su perìodu suo de màssima espansione, est devènnida sa fortificatzione militare prus manna de su mundu. Nointames su status suo de patrimòniu mundiale de s’Unesco, diversos cantos de s’istrutura a bellu a bellu sunt guastendesi o iscumparende de su totu. Custu prus che totu in sas zonas rurales, ue medas matones sunt istados impreados dae sos massajos locales pro fàghere domos o mureddas. Unu raportu de su cuotidianu Beijing Times in su 2016 at sutaliniadu chi iprus de su 30% de s’istrutura est andada pèrdida, mentras petzi s’8% est galu in bonas cunditziones.

Custu intzidente faghet cumprèndere galu de prus cale siat s’importu detzisivu de preservare e amparare su patrimòniu culturale mundiale. Iscòviat fintzas sa netzessidade de aplicare mesutas prus severas pro evitare disacatos sìmiles in su benidore, pro more de garantire chi custa meravìllia istòrica potzat èssere ammirada dae sas generatziones benidoras.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Eletziones provintziales a capudanne e bia libera a s’accabidu de su bilanciu: sa linea de sa Giunta Todde.

Sas eletzione po rennoare sas Provintzias sardas ant essere in cabudanne. Sa cunvocatzione uffitziale at arrivare intre sa fine de triulas, comente prenettat sa leze.

L’ at cunfirmadu sa presidente de sa Regione, Alessandra Todde, accabbadu s’addobiu de majoria chi si est fattu oe in Cunsizzu regionale, pagu prima de s’accorrada de sa Giunta. Todde at accraradu chi non si prenettant dilatas, pro itte donzi mudamentu de su calendariu de sas eletziones diat ispettare a su Cunsizzu regionale, e a custu mamentu no si est discutinde de cambiare sa leze. Su caminu addurat duncas deffinidu dae sa leze approada a innantis, chi ghiat sa colada dae sas Provintzias cummissariadas a organismos eleggidos.

In su mentre de s’addobiu, sa maggiorantzia at cundivididu su bisonzu de torrare a votare in manera deretta, intentu chi bi est fintzas in sa proposta fatta dae pagu de leze natzionale. S’intentu est cussu de binchere in manera deffinitiva sos effettos de sa leze Del Rio, chi medas de s’alleantzia cussiderant comente mesu de criticidade in sa conduida de sos entes locales. Intre sos temas accomettados fintzas sa situatzione de sos casi chentu
Comunes sardos chi ant a deppere votare s’annu imbeniente, una cosa chi aiat pesadu dudas supra sa partecipassione de amministratziones accanta a sas iscadentzias. Intames, sa Sardigna addurat s’unica regione italiana cun Provintzias chi sunt cummissariadas, cosa chi sos de sa majoria pensant chi no siat pius possibbile.

A su tzentru de sa zoronada puru s’accabidu de su bilanciu preparadu dae s’assessoradu ghiadu dae Zuseppe Meloni. Sa manovra, chi balet casi 800 miliones de euros, at essere approada a sero dae sa Giunta po che la podere mandare a sas cummissiones chi tenent sa cumpetentzia. S’intentu est de alcansare unu bia libera in presse dae s’Aula, rispettande sas iscadentzias de s’esercitziu finantziariu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22