Sa Siaarti (Sotziedade Italiana de Anestesia Analgesia Rianimatzione e Terapia Intensiva) at atzetadu chimbe chircas sientìficas realizadas dae su repartu de Anestesia e Rianimatzione de s’ispidale de Lanusè. Sos istùdios ant a èssere publicados in sos meses imbenientes dae sa rivista sientìfica Jaacc (Journal of Anesthesia, Analgesia and Critical Caras) e ant a bènnere presentados in santugaine in su cungressu “ICare 2023”, organizadu in Roma de sa matessi Siaarti. In su cungressu at a èssere presente una delegatzione de su nosocòmiu ogiastrinu chi at a acrarire sas chircas comente “comunicatziones orales” durante s’addòbiu.

Sas chimbe chircas sunt istadas conduidas  dae unu grupu de traballu formadu dae 12 professionistas: 5 mèigos e 7 infermieris. «Custos istùdios a s’ispissu sunt realizados dae iscuadras de mèdicos ebbia– ispiegat Francesco Loddo, diretore de s’istrutura cumplessa de Anestesia e Rianimatzione de s’ispidale de Lanusè – in custu casu amus interessadu fintzas sos infermieris e custu est un’aspetu chi est istadu apretziadu meda dae chie at valutadu sos traballos nostros». Sos istùdios sunt istados isvilupados in s’arcu de belle un’annu: si tratat de anàlisi de sos datos, istùdios clìnicos e isperimentatziones. A los unire, b’at unu mìnimu comunu denumenadore: «Totu sos traballos punnant a su megioru de s’assistèntzia anestesiologica e rianimatòria de sos malàidos – sighit Loddo – e tenent giai un’aplicatzione pràtica a s’internu de s’unidade operativa nostra».

Sas chimbe chircas imprassant diverss campos de su traballu giutu dae in antis a s’internu de s’unidade operativa de Anestesia e Rianimatzione de s’ispidale de Lanusè. «Unu de sos istùdios – ispiegant Giacomo Olla, mèigu, Virginia Piroddi e Micaela Muceli infermieras – derivat de s’impreu, in sa pràtica clìnica, de una variante tècnica de sa tracheotomia percutanea dilatativa chi resurtat dae sa cumbinatzione de duas àteras tècnicas, cun sa punna de isfrutare sos prètzios de ognuna. Sos resurtados sunt istados positivos». Un’àtera chirca at pigadu isghiu dae s’eredade e de sos insegnamentos lassados dae su Covid. «S’istùdiu at dimustradu comente  su mantenimentu de unas cantas medidas non tropu restritivas, adotadas durante sa pandemia e poderadas in manera  fintzas a pustis (gasi narados “bundles”) – sutalìniant Anna Busia, moderadora infermieristica, Erica Lai e Simona Serdino, infermieras – apant contribuidu a reduire sas infetziones a s’internu de su repartu de Terapia Intensiva». Un’àteru istùdiu s’est cuntzentradu subra  su còmpudu de sa flora batèrica e sa gestione de sas infetziones.

«Custu cunsentit de impreare sa meighina prus performante comente  ùrtima ratio – pretzisa Francesco Loddo- e tenet comente cunsighèntzia fintzas unu rispàrmiu mannu pro sas càscias de su Sistema sanitàriu natzionale».

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Intre delusione e identidade: sa Sardigna in su film nou de Bonifacio Angius

Dae su 30 de santugaine imbatet a sas salas Confiteor – Comente apo iscobertu chi non dia a àere fatu sa rivolutzione, su film nou de Bonifacio Angius, unu de sos registas prus originales e coerentes de su panorama tzinematogràficu italianu de oe.

A pustis de àere otentu su Prèmiu Lizzani in sa Mustra de su Tzìnema de Venèzia pro su mègius film, seberadu dae una giuria de gestores, s’òpera torrat in sa terra chi l’at fata nàschere e chi nde prenat s’ispìritu: sa Sardigna. Sa distributzione at a mòvere dae sas tzitades prus mannas e a pustis at a imbàtere a bellu a bellu a àteras salas meda, dae nord a sud de s’ìsula.

A pustis de una sèrie de anteprimas fatas in sas tzitades italianas prus importante, dae Roma a Bologna, dae Perùgia a Firenze, su film imbatet duncas “a domo” pro si riunire cun cussu pùblicu chi prus de sos àteros podet agatare sa sustàntzia profunda de su contu in sos paesàgios suos, in sos silèntzios e in sas caras. Fatu cun s’agiudu de sa Regione Autònoma de Sardigna, de sa Fundatzione Sardigna Film Commission e de àteros sòtzios natzionales, Confiteor si presentat comente un’òpera personale meda, ma chi podet faeddare a totus.

Est unu biàgiu profundu chi aunit su privadu e su polìticu, sa memòria e sa delusione, sa chirca de un’identidade in unu tempus in ue sos sognos de cambiamentu paret chi si depant isfàghere. Cun custu film nou, Angius cunfirmat s’istile suo ùnicu: assutu, deretu, ma prenu de un’umanidade bera e de una malinconia chi apartenet a sa terra sua. Sa Sardigna, una borta in prus, no est iscenàriu ebbia ma personàgiu biu, ispigru de sos turbamentos e de sas isperàntzias de totus.

In sos ùrtimos annos, su tzìnema sardu at connotu a beru una rinàschida. Gràtzias a registas comente Angius e a una generatzione de autores bonos a aunire sa fortza de sas raighinas cun unu puntu de vista modernu, s’ìsula s’est fata puntu de riferimentu in su panorama natzionale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”