Istituida dae sa cooperativa sotziale Zerocento paris a su Comunu de Jersu, ue fiat nàschida e crèschida.

Una bursa de istùdiu pro ammentare a Maria Vittoria Orrù, giòvana professionista de sas risoerse umanas, morta su 16 de austu 2022 a 44 annos ebbia. L’at istituida sa cooperativa sotziale Zerocento de Faenza pro ammentare sa fèmina – dipendente de sa cooperativa dae 14 annos – in collaboratzione cun su Comunu de Jersu, in Ogliastra, ue fiat naschida. Sa bursa tenet unu balore de duamìgia èuros e podent partetzipare istudiantes e istudiantes cun mèritu chi apant cunsighidu sa maturidade in s’annu iscolàsticu 2022-23 in s’Istitutu de Istrutzione Superiore ‘Armando Businco’ de Jersu, ue Vittoria si fiat diplomada, e chi siant iscritos a su primu annu acadèmicu. S’obietivu est de sustentare sa continuidade in sos istùdios universitàrios de sas generatziones noas, in particulare cuddas chi apartenent a sas categorias sotziales prus fràgiles, in sa terra ue Vittoria fiat naschida. Totu sos particulares de su bandu, chi iscadit su 30 trìulas, sunt publicados in su giassu istitutzionale de su Comunu de Jersu.

Paris cun s’istitutzione de sa Bursa de istùdiu, Zerocento at donadu a sa biblioteca comunale de Jersu fintzas 80 libros presentes in s’archìviu aziendale de Vittoria, totus subra de temàticas de su traballu suo,.

“Cherimus chi su traballu, sa dedizione e sa cura chi Vittoria at dedicadu a sa cooperativa, a sa Sotziedade People de cale fiat Presidente e a sas persones no andent pèrdidos — decrarat Stefano Damiani, Presidente de sa cooperativa Zerocento. — Sos insegnamentos e s’umanidade chi Vittoria poniat in sa professione sua sunt istados in sos annos fundamentales pro sos medas chi l’ammentant cun reconnoschèntzia pro su chi at fatu e pro su chi fiat. Mantènnere in su tempus sa memòria de Vittoria est un’ispetu colletivu de chie si siat l’apat connota, inoghe in Faenza ue traballaiat, in Lugo ue biviat e a Jersu ue fiat naschida e creschida. Sa bursa de istùdiu e sa lassa de sos libros a sa biblioteca sunt unu passu piticu chi andat conca a custa diretzione”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22