In s’àmbitu de unu servìtziu fotogràficu, Oliviero Toscani est bènnidu a Ogiastra, in sas biddas chi costituint sa Zona Blu sarda. Dae immoe finas a su 8 cabudanni, su fotògrafu est bisitende sas domos de sos tzentenàrios e  residentes in sos comunos de Àrthana, Baunei, Foghesu, Biddamanna, Talana e Orthullè pro realizare sos iscatos suos a s’internu de sas abitòrios issoro.

Creadore de su progetu “Ratza Umana – Human Race” e figura de importu in s’àmbitu de sa fotografia, chi si sìtuat a metade caminu intre arte, moda e comunicatzione, Toscani at acollidu cun brègiu s’invitu de su regista Pietro Mereu, presidente de s’Assòtziu Culturale Mater Dea, acostagiadu dae sa vitzepresidente Ludovica Piras. S’obietivu fiat immortalare sos tzentenàrios de una de sas chimbe Blue Zonas, zonas geogràficas caraterizadas dae una longevidade manna.

“Chentu annos! Unu sisìgiu chi però ponet fintzas unu pagu de timoria”, cunfiat Toscani, reconnoschende chi lòmpere a un’edade gasi arta est unu bisu pro medas, ma chi podet fintzas generare timoria. Sos tzentenàrios trasmìtint unu sentidu de trancuillidade, fortzis ca dimustrant de non disigiare àteru de sa vida prus de su chi ant giai bìvidu. Su fotògrafu annòdiat un’assimìgiu intre de issos, comente  chi apartenent a una comunidade de extraterrestres, cun un’àera chi unit passadu e benidore. “Sunt seguru èsseres umanos dèchidos meda”, concruit.

“Medas fotògrafos si sunt postos a retràere sos tzentenàrios sardos, ma apo semper pessadu chi esseret netzessàriu unu progetu cumpartzidu e unu grandu mastru pro los fotografare”, ispiegat Mereu. Custu cumbinchimentu l’at ispintu a mutire a Toscani, chi at aderidu deretu a su progetu, ammentende chi unu de sos primos traballos suos pertocaiat su retratu de sa fèmina prus besta de su mundu, Jeanne Calment, chi aiat bìvidu finas a s’edade de 122 annos e, a pitzinna, puliat sos pennellos de Van Gogh a Arles.

Sas fotografias de su mastru ant a èssere imprentadas in formadu gigante e postas in sos vàrios comunos chi apartenet a sa Zona Blu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”