Tortolì tenet unu presidente nou a sa ghia de sa sotziedade ADS Castor 1977: Giancarlo Lobina. A pustis de àere cobertu su ruolu de vitzepresidente e diretore isportivu in sos ùrtimos bator annos, Lobina est istadu elègidu a s’unanimidade comente su sutzessore de su presidente uscente, Marco Ferrai. Custa nòmina est istada acollida cun entusiasmu e congratulatziones dae medas tifosos, chi ant manifestadu sa cuntentesa issoro e s’incoragiamentu issoro pro custu incàrrigu.

In una nota ufitziale emìtida dae sa sotziedade, Lobina benit descritu comente una persone de balore mannu meda e cun unu atacamentu ispetziale a sa sotziedade. S’esperièntzia sua comente vitzepresidente e diretore isportivu l’at frunidu una base sòlida pro assùmere custu incàrrigu nou de responsabilidade. Su presidente uscente, Marco Ferrai, at retzidu sos prus intesos ringratziamentos pro su contributu suo in sos annos passados e at a abarrare a disponimentu a s’internu de sa dirigèntzia.

In sas dies imbenientes, Lobina at a assignare ruolos e incàrrigos a sos àteros dirigentes chi ant a traballare a istrintu cuntatu cun issu. Custa detzisione mirat a garantire unu suportu sòlidu e una diretzione eficatze pro su benidore de sa sotziedade. Lobina at espressadu sa gratitudine sua pro totus sas congratulatziones e sos incoragiametos retzidos a pustis de sa nòmina sua. In prus at ringratziadu totu sos dirigentes pro s’aficu postu in issu, afirmende chi at a traballare sena pasu pro otènnere sos mègius resurtados possìbiles. Sutalìniat in prus s’importu de traballare in grupu, ca est petzi a traessu de un’aficu colletivu chi una sotziedade podet prosperare e lòmpere sa resessida.

Sa nòmina de Giancarlo Lobina comente a presidente nou rapresentat unu capìtulu nou in s’istòria de s’ADS Castor 1977. Cun s’aficu suo, s’esperièntzia sua e sa determinatzione sua, Lobina at a ghiare sa sotziedade cara a noos disafios e obietivos ambitziosos. Sa comunidade de Tortolì càstiat a in antis cun aficu a custu corsu nou, segura chi Lobina at a giùghere energia e passione in su ruolu suo de presidente, contribuende a promòvere s’isport e a fàghere crèschere sa sotziedade.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22