Un’importante funtzionàriu de su guvernu indianu est istadu suspesu dae su traballu a pustis de àere ordinadu a sos dipendentes suos de isboidare totu s’abba de una diga pro pro recuperare su telèfoneddu suo, de su balore de 1200 dòllaros, chi a malasciagura li fiat rùidu a intro faghendesi un’autoscatu. Segundu su chi at contadu sa testada giornalìstica inglesa Bbc, s’operatzione  de isboidamentu de su batzinu ìdricu at rechertu tres dies e at interessadu sa diga de Kherkatta chi cunteniat prus duos milliones de litros de abba.

S’autore de custu machiore est un’ispetore alimentare, Rajesh Vishwas. Su funtzionàriu, interrogadu dae sos capos de sa sotziedade sua, at ammìtidu de àere fatu rùere su tzellulare durante s’iscatu de una foto. Ma a su dannu s’agiunghet fintzas sa befa. Difatis, cando su telefoneddu est istadu recuperadu, s’aparitzu fiat tropu iscalabradu dae s’abba pro pòdere funtzionare in manera curreta.

Su funtzionàriu at sustentadu de àere fatu su chi at fatu pro more ca su telèfonu cunteniat datos sensìbiles de su guvernu, ma est istadu acusadu de abusu de positzione.

A su comintzu, Vishwas at mutidu sos sommotzadores pro chircare de recuperare su telèfonu, ma posca at detzìdidu de pagare pro fàghere intervènnere una pompa. At afirmadu de àere otentu unu permissu verbale dae unu funtzionàriu locale pro isboidare “unu pagu de abba in unu canale serente”. Sa pompa est abarrada tirende abba unas cantas dies, pompende duos milliones de litros de abba, su tantu pro abbare 600 ètaros de terrinu agrìculu. Nointames, s’operatzione est istada interrùmpida cando un’àteru funtzionàriu de su dipartimentu de sas risursas ìdricas at intervènnidu.

De cunsighèntzia, Vishwas est istadu suspesu dae s’incàrrigu suo in isetu de s’abertura de un’inchiesta pro su cumportamentu suo. S’atzione de su funtzionàriu at pesadu pensamentos subra de s’abusu de pòdere e de s’impreu irresponsàbile de sas risursas ìdricas.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa birra sarda sighit a si distinghere a livellu natzionale e europeu, accuccurrande una filera de riconnoschimentos de grandesa chi ponent in lughe s’estremadia de su prodottu isolanu e sa solidesa de sa filera regionale de sa birra. Custos premios cunfirmant su sutzessu creschente de sas favricas artigianales de sa birra in Sardigna e s’effettu de signifficu supra su mercadu regionale e addia.

Dae pagu tempus, sas favricas de birra isulanas ant brilladu in medas manifestatzione importantes, incluinde abbenimentos meda connoschidos commente su Vinitaly 2024 e su Bartzellona Beer Challenge, unu de sos cuncursos de sa birra pius de grandesa de Europa, addia a su Cuncursu Internatzionale de Lione.

In mesu de sos personaggios printzipales de custa serie de sutzessos, si est annoddittada sa favrica de birra Puddu de Santa Giusta,Aristanis, chi at conchistadu tres medallas (oro,arghentu e brunzu) a su Bartzellona Beer Challenge po sas variedades Porter,Saison e Coffee Porter, binchinde puru su titulu de menzus favrica de birra zovana de sa gara. Sa favrica de birra Battor Moros de Guspini, at binchidu duos oros po sas birras Puttu 16 Helles e Puttu 9 Vienna Lager, e sa favrica Artigiana Horo de Sedilo at retzidu una medalla de oro po sa Tifo Mourinho e una de arghentu. Puru sa favrica de birra Agricola Reforte de Benetutti at binchidu una medalla de brunzu cun sa birra Su Boboti, e sa favrica de Birra Keja de Bari Sardo at conchistadu una medalla de arghentu cun sa Calmedia, un’India Pale
Lager.

A su cuncursu internatzionale de Lione, sa favrica Birrificio “Isula” de Thiesi at binchidu medas medallas de oro po medas variedades, in mesu de sas cales sa Pale Ale, sa coffee stout e sa pils, addia una medalla de arghentu cun sa Session Ipa. In pius a su Vinitaly, su premiu “silver” a su design po sa classe birras, est bistadu dadu a sa Wine Explosion – IGA Mogorese a su Semidano favrica de birra Bam de Mogoro.

Su presidente e su direttore de Coldiretti Sardigna, Battista Cualbu e Luca Saba, ant evidentziadu s’importantzia de custos riconnoschimentos, chi premiant su tribagliu tostu de sas favricas de birra artigianales de sa Sardigna in s’agguantare tottu sa filera de sa birra regionale. Coldiretti Sardigna at fattu partire unu disignu ambitziosu meda po azzuare custa filera, faghinde partetzipare sos chi produene su ranu,s’orzu,malto e luppulu, paris cun sas favricas de birra e su Consorziu de sa Birra Italiana.

Custu disignu cheret favoressere una produssione de s’isula cumpleta, dae sas materias primas a su prodottu finidu, cun s’intentu de rispondere a tottu sas esigentzias de sa filera. Gratzias a custa initziativa, sunt arrivados finatziamentos importantes meda dae sa Regione, po agguantare sas favricas de birra a sos produttores de orzu, preparande su terrinu po accomettare sas porfias de su tempus benidore cun ressignu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22