Sa Grande Jatte at otentu una resessida manna in sos Giardinos Pùblicos de Casteddu, carrende su pùblicu in unu biàgiu in dae segus in su tempus finas a s’època vitoriana, ispiradu a su cuadru famadu de Seurat “Una domenica pomeriggio sull’isola della Grande-Jatte”.

S’eventu est istadu unu trìunfu mannu a beru, cun chentinas e chentinas de persones chi ant partetzipadu divertidas in sas medas fainas e si sunt lassadas incantare e ammajare dae sos costùmenes e de sas ambientatziones de su Otighentos, atzufende·si in una bera màchina de su tempus a mannària naturale.

Su programa ricu meda de s’eventu at ofertu maicantas atratziones, intre cales ismùrgios in  s’erba, mùsica, ispetàculos e travestimentos a tema, cun un’interpretatzione onteressante “steam-punk”. In prus, una mustra-mercadu at ofertu sa possibilidade de iscobèrrere e acuistare ogetos ispirados a s’època vitoriana.

Ma custu chi at rèndidu s’eventu galu prus ispetziale est istada sa partetzipatzione manna meda de su pùblicu, seguru favorida dae sa die bella de sole e dae sa cuncomitàntzia cun sa manifestatzione famada de  Monumentos Abertos, unu àteru eventu chi in cada editzione atzocat a Casteddu una surra de bisitadores e turistas dae ogna logu.

Chentinas de persones ant partetzipadu cun brègiu a sos eventos, ammirende sos costùmenes magnìficos e atzufende·si in sas ambientatziones dèchidas de su Otighentos, creende un’esperièntzia indimenticàbile in custa màchina de su tempus a mannària naturale.

Sos organizadores sunt cumbintos chi custa siat istada s’editzione prus resèssida de semper, e custu lassat isperare  bene fintzas pro sos annos benidores. Sa Grande Jatte est devènnida un’apuntamentu fitianu e abetadu meda in su beranu casteddaju, atirende semper prus partetzipantes atzisados dae sa maghia e dae sa bellesa ispantosa de sas ambientatziones e sos costùmenes de s’època vitoriana.

Una domenica pomeriggio sull’isola della Grande-Jatte (Un dimanche après-midi à l’Île de la Grande Jatte), sardu “Unu domìnigu a merie in s’ìsula de sa Grande-Jatte”, est una pintura de su pintore frantzesu  Georges Seurat, e est istadu fatu in su 1884-86. Como s’agatat in su museu Art Institute of Chicago.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Mario Pes: sa Sardigna contada po mesu de sa mirada de s’arte fottograffica.

Merculis 18 de frearzu su SEARCH de Casteddu at avviadu una mustra dedicada a Mario Pes, frigura tzentrale de sa fottograffia sarda de su Noighentos, capatze de fundere dilighesa artistica e asserva sotziale. Sa mustra sinzat su cuccurale de su disignu incumintzadu in Nugoro in S’Ispatziu Ilisso e isfroscadu in sos urtimos meses cun abbenimentos editoriales e cun films, chi ant ghiradu s’attentzione de sa critiga e pubbrica supra unu mastru de sa cultura bisiva isulana.

Intitulada “Mario Pes. Sa Sardigna intre connottu e modernidade”, sa mustra apparat una bista de mandu supra sa tzittade de Casteddu e s’iscrocca sua,repessados po mesu de s’obbiettivu de un’artista chi revertiat donzi iscena de sa die in cumposissione bisiva.

Prus de 200 friguras, medas in mesura manna, ghirant logos de sa tzittade e de sas lacanas, caras, architetturas e logos de tribagliu cun d’una fortza poetica chi andat prus a daenantis de sa simple documentassione. Donzi fottograffia est unu resumene de geometria, lughe e aera, un’echhilibriu intre castiada reale e bisione de bellesa. Sa fottograffia de Pes mi movet donzi mamentu supra s’affrontadura intre arte e cronaga.

Sa mirada sua abbizosa a sas tesones sotziales de sa tzittade, divenit limbazu bisivu, capatze de ghirare s’umanidade e operosidade chi animant sa Sardigna de s’incumintzu de su Noighentos. Importantzia particulare tenet su contu de sos logos de tribagliu, incluidinde s’esperientzia de sas feminas, ghirada cun delicadesa e rispettu, chentza discursos ma chin seru artisticu fungudu.

S’allestimentu, curadu dae s’architetto Antonello Cuccu,amplariat sa fortza poetica de sas friguras e cumbidat su bisitadore a s’affundare in su logu fottografficu, a si firmare e attibbire sa mesura de sa bellesa de sos logos fottograffados dae Pes. Sa mustra prevedit bisitas ghiadas, buttegas didatticas e devuccamentos po accumpanzare su pubbricu in d’unu caminu chi faghet attibbire e chi est prenu de cultura fintzas a su 4 de aprile 2026.

Po accabbare s’esperientzia, su docufilm iscrittu e setadu dae Enrico Pinna, torrat in daesegus sa coerentzia artistiga e s’indipendentzia de su pensamentu de su fottograffu intrintzinde sa muda pessonale e s’istoria cumone.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22