Chenàbura su 19 de  maju a sas 21.00, in piatza Santa Gruche de Orane, at a andare in iscena “Mannos e minores, una bidda pro sa pitzinnia“, sàgiu finale de su laboratòriu teatrale in limba sarda chi at interessadu sos pipios de 4 e 5 annos. Sa faina faghet parte de sa programmatzione de s’isportellu linguìsticu intercomunale de Fonne, Orgòsolo e Orane, finantziadu cun sa L. 482/99 e LR 22/2018 e gestidu dae sa Sotziedade Suìa.

Sos pitzinnos chi gioghende ant a leare s’iscena chenàbura 19 de maju, dae su mese de freàrgiu ant sighidu in s’ex asilu de “Sa ‘e Mastio” su laboratòriu “Teatru in limba sarda. Sos pitzinnos connoschent sas pessones famadas de Orane“, ghiadu e pensadu dae Valentina Loche.

S’atoressa e educadora oranesa, chi s’est ocupada fintzas de s’iscenegiadura, in tres meses de faina laboratoriale, impreende sa limba sarda, intre giogu, narratziones e esertzìtzios, at fatu bìvere sa prima esperièntzia teatrale a unu grustu geniosu e abbistu de  atoreddos de s’iscola de s’infàntzia interessende•los cun sas istòrias de sos pessonàgios de cabbale de sa bidda de Orane: Costantino Nivola (artista), Mario Delitala (pintore), Marianna Bussalai (iscritora e poetissa), Piero Borrotzu (partigianu).

“In  su sàgiu ispassiosu chi amus cuncordadu cun sos pipios – ispiegat Valentina Loche – b’at a àere un’addòbiu intre sos atores minoreddos de Orane e sos pessonàgios prus famados de sa bidda chi ant a fàghere unu biàgiu temporale finas a sas dies nostras. Gasi sos pessonàgios nòdidos de Orane e sos piticos tzitadinos s’ant a aunire pro ammaniare una bidda a mesura de pipiu, in intro de una sotziedade ue totu andat de presse e non nos restat su tempus de osservare e gosare de sa bellesa chi tenimus a ingìriu”.

“In sos addòbios de cada chida – agiunghet Ivan Marongiu de sa Sotziedade Suìa – sos dischentes ant fatu esperièntzia de recitatzione pro mèdiu de su giogu, impersonende sos pessonàgios famados de Orane e faghende•los interagire tra issos cun isceneddas de vida de ogni die. A cussu puntu su contu de sa vida issoro est devènnidu un’ispetàculu colletivu“.

Como est arribbadu su momentu finale de contare s’istòria issoro a su pùblicu! E tando, abarrat ebbia de si fàghere agatare prontos in pratza Santa Gruche, su 19 de maju a sas 21.00 in Orane.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Buscos Abertos 2026, battoro addobios po iscoperrere su Parcu de  Tepilora.

Sae de chimbe edissiones de “Buscos Abertos” est pronta a torrare a battire a su tzentru su patrimoniu culturale de su Parcu de Tepilora cun d’unu calendariu de battoro zoronadas ispartas in sos comunes de sa zura diffendida. Si partit sapadu 11 de aprile dae Lodè mentres sa die imbeniente s’initziativa at a passare in Bitzi. Su programma at a sighire su 19 in Torpè e at accabbare su 25 de aprile in Pasada.

Sa bogada a campu proponnet attividades pensadas pro unu pubbricu mannu cun attentzione particulare pro sas famiglias e appassionados de sa natura. Sas passizzadas ghiadas e sas attividades praticas ant a permittere de connoschere dae accanta logos e bistas apparande esperientzias derettas e chi appassionant. In su mentres de sas dies ant essere proponnidoss fintzas momentos dedicados a s’istoria, s’archeologia, su connottu locale e s’isport.

Non ant a mancare sos produttos de s’iscrocca e sos tribaglios de s’artesanadu imparis a momentos de disaogu e addobios musicales. Sos partetzipantes ant a podere rugare iscenarios meda divressos intre issos, dae sos buscos de s’arta Barbagia fintzas a sas zuras lentas de sa costa de sa Baronia sighinde su cursu de su riu Pasada. Sas bisitas si ant a podere faghere a pe, in bicicretta o a caddu oppuru in quad ma fintzas in kayak o cun d’unu trenu pitticcu, permittinde a tottus de seperare sa manera prus adatta pro bivere su Parcu.

S’initziativa est accottada dae sa Regione Sardigna e da sa Fundatzione de Sardigna e d’est ordiminzada dae sa cooperativa Istelai cun s’accottu de sos tzentros de educatzione ambientale de s’Agentzia Forestas, de sos assotzios locales e de sos operadores de s’iscrocca. Su presidente de su Parcu Martino Sanna evidentziat comente s’interventu est divennidu in sos annos un’addobiu importante meda, capatze de faghere accudire bisitadores e de favoressere una manera de bivere
s’iscrocca, prus attenta a sa natura, a sa cultura e sa cundivisione.

Buscos Abertos si cuffirmat duncas comente un’occasione pro connoschere dae accanta s’iscrocca, abbaccare sos ritimos e iscoperrere su balore de s’istare imparis in ambientes naturales de bellesa manna, balorizzande sos benes locales e su ligonzu intre comunidade e ambiente.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22