Un’iscògliu, a s’internu de una pitica incrovinadura de Cala Biriala, prenda naturalìstica de sa costa de Baunei, in Ogliastra, est istadu imsugiadu e imbrutadu cun una bomboledda spray.

A fàghere s’iscoberta, un’imbarcatzione chi colaiat dae cuddas partes, bidu chi a s’iscògliu faghet a bi cròmpere petzi dae mare e paret chi s’isfrègiu chi rafigurat una sigla disconnota, non siat istadu fatu dae sos vàndalos ma de unu grustu de grafitaros frantzesos.

Un’informatzione chi est lòmpida fintzas a su sìndigu de Baunei Stefano Monni, ma chi est galu de averguare cun sas iscumbatas portadas a in antis dae sos Carabineris. “Eris m’est lòmpida sa noa e custu mangianu so andadu a averguare de persone su dannu fatu a s’iscògliu cun una vernitze chi non si podet samunare e sa cosa m’at acoradu meda – at naradu a s’ANSA su primu tzitadinu de Baunei -. Lu retèngio un’atu criminale e covardu chi deturpat sas perlas prus pretziosas chi tenimus, un’agressione de badas a su chi est istadu definidu su mare prus bellu de Itàlia. Paret chi a lassare sa firma intzivile siat istadu unu grupu de grafitaros frantzesos ma sos carabineris sunt indaghende duncas non tenimus sa seguresa.

Su chi potzo nàrrere est chi semus averguende cun sos espertos sas possibilidades de interventu cun una màchina arenadora chi at a èssere alimentada dae unu grupu eletrògenu mòbile de giùghere e in sas dies imbenientes amus a intervènnere cun passèntzia e pretzisione”.

Medas sos voluntàrios chi sunt oferendesi in custas oras pro limpiare s’iscògliu: “So retzende medas telefonadas dae persones chi cherent dare una manu pro fàghere torrare cussu logu comente fiat a in antis e sa cosa mi faghet meda pràghere – concruit Monni -. Amus a protzedire in sas dies imbenientes a sa pulitzia e l’amus a fàghere cun sos espertos e in cuntatu costante cun sas fortzas de terra e de mare chi ant a agiuare sos traballos”

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Piantagione manna de marijuana in sa zona de Aristanis: noe arrestos e fua impedida dae sos carabineris

Una piantagione manna de cànnabis cun prus de 7 mìgia prantas est istada iscoberta in sas campagnas de Terraba, a canta a Aristanis, cun su bilàntziu de noe arrestos, e intre custos unu minorenne. S’operatzione, fata dae sos carabineris de su Repartu Operativu – Nùcleu Investigativu de Aristanis paris cun su Corpus forestale e de vigilàntzia ambientale de sa Sardigna, est unu de sos secuestros prus de importu de sa zona in sos ùrtimos meses.

S’iscoberta de custa cosa est su frutu de un’atividade atenta de controllu de su territòriu dae sa forestale de s’istatzione de Marrùbiu, chi ant agatadu sa coltivatzione suspeta, sighida dae osservatziones remotas fatas cun drones paris cun sos carabineris. Sos atzertamentos in contu de THC, fatos dae su RIS de Casteddu, ant cunfirmadu chi sas prantas cunteniant livellos de printzìpiu ativu prus artos meda de sos lìmites de lege.  Est sa de chimbe piantagiones secuestrada in zona de Aristanis in sos ùrtimos duos meses.

Su blitz est iscatadu cando sos militares ant agatadu unas cantas persones chi tentaiant de nde tirare sas prantas in su terrinu tra Terraba e Arcidanu. Mancari s’alt de sos carabineris, sos suspetados ant chircadu de si nche fuire. Unu de sos mezos est istadu blocadu luego in ie, mentres a sos àteros duos lis ant postu fatu peri sas istradas de sa zona.

Su primu l’at firmadu sa patùglia Radiomobile, s’àteru l’ant intertzetadu in Àllai, in ue sas patùglias de sos carabineris de Mògoro ant blocadu ses chi si nche fiant fuende, luego los ant percuisidos e leados a caserma. Cando ant controlladu sos mezos ant agatadu ràdios rice-trasmitentes, passa-montagna, atretzos pro ispacare e segare e dinari in contante, totu cosas chi faghent a cumprèndere chi esseret unu
progetu organizadu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”