Est sutzèdidu a note. Podiat capitare una disgràtzia: a su cumintzu de bia de Roma, una mata manna de su ficus seculare s’est iscascialada ruende subra de un’edìcola chi pro ditza bona fiat serrada.

In casteddu unu ramu de su ficus chi s’agatat a su cumintzu de bia de Roma s’est truncadu, ruende subra de s’edìcola e subra de su tretu de caminu dae in antis su cantieri, giai serradu a su tràficu. Sa nae de sa mata chi nd’est rutu est caladu peri subra de  unos cantos cavos elètricos. S’allarme a sas fortzas de s’òrdine est arribbadu a sas 5 de su mangianeddu. Pro fortuna su fatu s’est averguadu a tardu mannu de sa note, cando s’edìcola fiat galu serrada. In su logu de s’intzidente est arribbada deretu sa politzia de istadu e cussa munitzipale chi ant avisadu sos  vìgiles de su fogu. Sos pompieris ant postu in deretura su logu in seguresa. Sunt lòmpidos fintzas sos operajos de su servìtziu de su birde pùblicu de su Comunu, chi ant provididu a nde pesare sos cambos mannos de su ficus seculare. A pustis sunt intebènnidos peri sos tècnicos de s’Enel chi ant acontzadu sos cavos de sa lìnia elètrica chi sunt istados segados dae sa mata.

Sos dannos sunt medas. Difatis, a banda s’edìcola e sos cavos elètricos, sas naes de sa mata ant fatu dannu peri a dues màchinas parchegiadas e a sas lìneas aèreas de sa Ctm.

Su fatu est capitadu rpòpia a s’arbèschida, prus a mancu cando fiant sas chimbe e mesu de mangiau, un’oràriu acanta in su martzapee non fiat colende nemos e s’edìcola fiat galu serradas.  In custas oras sunt in corsu sas indàgines de sos tècncicos comunales pro cumprèndere  sas càusas de su tzedimentu, chi si èssere acontèssidu in un’àteru momentu de sa die, massimamente un’oràriu  cando sa gente est andende a traballu, diat àere pòdidu causare una tragèdia grave a beru.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Piantagione manna de marijuana in sa zona de Aristanis: noe arrestos e fua impedida dae sos carabineris

Una piantagione manna de cànnabis cun prus de 7 mìgia prantas est istada iscoberta in sas campagnas de Terraba, a canta a Aristanis, cun su bilàntziu de noe arrestos, e intre custos unu minorenne. S’operatzione, fata dae sos carabineris de su Repartu Operativu – Nùcleu Investigativu de Aristanis paris cun su Corpus forestale e de vigilàntzia ambientale de sa Sardigna, est unu de sos secuestros prus de importu de sa zona in sos ùrtimos meses.

S’iscoberta de custa cosa est su frutu de un’atividade atenta de controllu de su territòriu dae sa forestale de s’istatzione de Marrùbiu, chi ant agatadu sa coltivatzione suspeta, sighida dae osservatziones remotas fatas cun drones paris cun sos carabineris. Sos atzertamentos in contu de THC, fatos dae su RIS de Casteddu, ant cunfirmadu chi sas prantas cunteniant livellos de printzìpiu ativu prus artos meda de sos lìmites de lege.  Est sa de chimbe piantagiones secuestrada in zona de Aristanis in sos ùrtimos duos meses.

Su blitz est iscatadu cando sos militares ant agatadu unas cantas persones chi tentaiant de nde tirare sas prantas in su terrinu tra Terraba e Arcidanu. Mancari s’alt de sos carabineris, sos suspetados ant chircadu de si nche fuire. Unu de sos mezos est istadu blocadu luego in ie, mentres a sos àteros duos lis ant postu fatu peri sas istradas de sa zona.

Su primu l’at firmadu sa patùglia Radiomobile, s’àteru l’ant intertzetadu in Àllai, in ue sas patùglias de sos carabineris de Mògoro ant blocadu ses chi si nche fiant fuende, luego los ant percuisidos e leados a caserma. Cando ant controlladu sos mezos ant agatadu ràdios rice-trasmitentes, passa-montagna, atretzos pro ispacare e segare e dinari in contante, totu cosas chi faghent a cumprèndere chi esseret unu
progetu organizadu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”