S’eletzione est acontèssida in su cungressu chi s’est tentu in sas dies coladas a s’hotel Regina Margherita.
Fiant presentes su segretàriu generale de Confintesa Francesco Prudenzano e su segretàriu generale Funtzione Pùblica, Claudia Ratti.

Satisfatzione manna pro sa partetzipatzione a su cungressu e pro s’eletzione de su segretàriu territoriale nou est istada espressada a s’agabbu de sos traballos de Giovanni Casu, segretàriu generale Funtzione Pùblica Regione Sardigna, chi at auguradu bonu traballu a su segretàriu nou.

Confintesa est una Cunfederatzione sindacale presente in totu su territòriu natzionale dae su 2003, annu de sa fundatzione sua, ativa mescamente in s’impiegu pùblicu. Dae sa fundatzione sua at espressadu crìticas contra su sistema de rapresentàntzia sindacale chi esistit in Itàlia e proponet una reforma sua, a comintzare dae s’istrutura pròpia e funtzionamentu.

Su 18 de cabudanni 2000 unu piticu grupu de sindacalistas de su pùblicu impreu s’est riunidu costituende sa Federatzione INTESA. Su 23 de nadale 2003, duos sindacados giai rapresentativos in su Pùblicu Impreu privatizadu, Federatzione INTESA e SNAPRECOM (Sindacadu Natzionale Autònomu de sa Presidèntzia de su Cussìgiu de sos Ministros) ant donadu vida a Confintesa, chi naschet, duncas, cun sa caraterìstica de èssere giai Cunfederatzione rapresentativa in manera majore in s’àmbitu de sos cumpartos de su Pùblicu Impreu. Dae su 2004,  pro diversos annos, at sustentadu sa pelea pro su reconnoschimentu de s’autonomia sua cun àteras Cunfederatziones e, pro su reconnoschimentu de  s’àmbitu de rapresentatividade sindacale suo, cun Aran.

In su mese de làmpadas 2010 sa Federatzione INTESA firma un’acòrdiu cun s’UGL, chi dat vida a sa formatzione sindacale UGL-INTESA FP, reconnota mescamente in su cumpartu de sos ministeros in su triènniu 2013-15.
In su 2012 est istadu elègidu su primu segretàriu generale de UGL-Intesa Funtzione pùblica: Francesco Prudenzano. Custa cungrega a sa fine de su 2014 intrat in discussione cando comintzat una sèrie de cherellas giuditziàrias subra s’eletzione de su Segretàriu Generale nou de s’UGL.

Lassada s’UGL, Federatzione INTESA in su ghennàrgiu 2016 torrat a su progetu originàriu, torrende a leare su percursu de Confintesa in manera pretzedente interrùmpidu, e rilantzende sa faina cunfederale in totu sos àmbitos cuntratuales. Prudenzano assumet sa Segreteria generale de sa Cunfederatzione, cun Taddeo Albanese, giai segretàriu generale de s’UGL, elègidu presidente.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22