Grandu satistatzione pro s’Alter Nos numenadu a friscu, Roberto Mura, cussigeri comunale e capugrupu de su Partidu Sardu, chi in s’atopu de su Cussìgiu de martis su 21 de martzu 2023 est istadu investidu de s’incàrrigu de rapresentare su primu tzitadinu de Casteddu Paolo Truzzu pro sa 367^ Festa de Sant’Efis.

Babbu de tres fìgios, trintasete annos, pro su consigieri de s’Amministratzione casteddaja at a èssere unu momentu prenu de emotzione s’apuntamentu de su 1 de maju cando at a tènnere s’onore de rapresentare sa Munitzipalidade in totu sas tzerimònias tziviles e religiosas.

Retzidu su Toson de oro e sa fàscia tricolore dae sas manos de su Sìndigu Paolo Truzzu, pro Roberto Mura ant a èssere bator dies prenos de impinnos ma in su pròpiu momentu indimenticàbiles pro more de s’afetu de sos devotos a su Màrtire gherreri e de sa sacralidade de una Festa.

S’Alter Nos, est unu cumponente primàriu de sa festa e professone de Sant’Efis. A unu tempus fiat su rapresentante de su Monarca de Ispagna, su Vitzeré, “s’Àteru nois”. Paràulas simpres, pro una funtzione simpre: sa de rapresentare su pòpulu e sas istitutziones in una rapresentatzione cun artos balores populares e simbòlicos. Oe, non pro nudda, s’Alter Nos est unu rapresentante de su Comunu de Casteddu, designadu dae su Sìndigu. Como, comente a tando, s’Alter Nos agatat su tempus de s’incarèssere, in s’acumprimentu de sas funtziones suas durante sa Festa de Sant’Efis, a sas persones pòveras, cun problemas, a chie tenet bisòngiu, in manera discreta, pro evitare ispeculatziones. A issos donat s’agiudu de sas istitutziones e de sa fide in su Santu. Unu ritu fintzas s’investidura, fata petzi dae su Sìndigu de Casteddu: una bia inditadu, s’Alter Nos si depet manigiare a sa sola: devet ischire ghiare su caddu chi li benit assignadu e si depet cuncordare sa bestimenta tzerimoniale.

At a tènnere unu mese de tempus pro si fàghere connòschere dae sos membros de s’Artzicunfraria, chi l’ant a acumpangiare fatu de sa professone.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Su fenomenu de sos mangones in s’istagnu de Molentargius: un’ispettaculu naturale in su coro de sa tzittade.

S’istagnu de Molentargius, intre Casteddu e Quartu S. Elena, offerret unu de sos ispettaculos prus ammaghiantes de sa Sardigna cun sa presentzia regulare de sos mangones arrubios. Custos puzzones galanos, chi faghent parte de sa zenia Phoenicopterus roseus, sunt attirados dae sas abbas calmas e salamattas de sa zura, chi offerrint cundissiones ideales po los faghere pappare e faghere sos nios. Su Parcu Naturale Regionale de Molentargius-Saline, chi est mannu casi 1.600 ettaros e cumprendet istagnos, abba e salinas istoricas, est bistadu fattu po tutelare custu eco-sistema unigu, reconnoschidu a livellu internatzionale dae su Protocollo de Ramsar.

Sos mangones arribant donz’annu dae zuras divressas de su Mediterraneu, comente Francia,Spagna e nord Africa, e acciappant in Molentargius unu furriadorzu seguru gratzias a sas abbas bassas, riccas de cosa de pappare e paza marina, e a sa trancuillidade de s’ambiente. Dae su 1993, sa zura est divennida fintzas unu logu po faghere sos nios: donzi beranu sas cropas, fraigant nios de fangu, ponent sos ovos e creschent sos puzzoneddos, dande vida a unu fenomenu de biodiversidade ispettaculare.

Su tempus massimu de appellida andat dae martu a triulas, cando sos puzzoneddos naschent cun pinnammene ferulattu e sos mannos si movent tottu imparis, pappande e comunicande intre issos, creande una bera “nue arrubia” chi si biet dae attesu meda. Pro diffendere sas niadas, su Parcu controllat su livellu de s’abba e alindat s’intrada a carchi zura, garantinde gai sa trancuillidade chi serbit a sos puzzones. Fintzas fora de s’istajone sessuale, sos mangones  addurant a s’ispissu in s’istagnu o in sas zuras umidas accanta, comente s’istagnu de Santa Gilla, offerrinde un’ispettaculu unigu con sos bolos elegantes insoro e accumpanzados dae atteras zenias de puzzones de s’abba, intre sos cales mengones,tzurullios, filippas e anadras.

Sa presentzia de sos mangones in Molentargius, ets unu esempru craru de bivere imparis intre natura e tzittade, mustrande comente un’eco-sistema delicadu potat esistire a pagos passos dae su tzentru de sa tzittade. Custu fenomenu naturale no est solu un’occasione po su birdwatching, ma fintzas un’indittu de sa puresa de sas abbas e de sa calidade de s’habitat, cuffirmande s’importantzia de tutelare e balorizzare sas zuras umidas sardas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22