Su “Caminu de Santu Jacu” est su de sete  sos Caminos in Sardigna, chi interessant 300 Comunos pro unos 3.200 chilòmetros de percursu. Chimbantaduos Comunos ant sigladu s’acòrdiu pro sa creatzione de custu percursu nou, chi s’isvilupat a traessu totu sa Sardigna e chi rapresentat una proposta istratègica importante e istruturada pro sa valorizatzione de su patrimòniu identitàriu, istòricu e culturale de s’Ìsula. Su percursu, chi si presentat comente un’esperièntzia ispirituale, istòrica, culturale, ambientale e religiosa, est istadu ativadu e gestidu dae s’Assessoradu regionale de su Turismu, dae sa Cunferèntzia episcopale sarda e de sos comunos interessados, cun Mandas comente  capofila.

Sa punna est su de promòvere su turismu lentu e ispirituale, interessende sos territòrios e sos amministradores issoro, e de cumpletare s’oferta turìstica de s’Ìsula. Su protocollu firmadu cun sa Cunferèntzia episcopale sarda e sos cursos de formatzione pro ghias turìsticas religiosas rapresentant petzi unas cantas atziones postas in atu pro dimustrare s’importu istratègicu de custu tretu turìsticu, chi rispondet a una dimanda natzionale e internatzionale manna.

Pro sa promotzione de su percursu, sa Sardigna at a partetzipare a sa fiera ‘Fai la cosa giusta’ in Milanu, in ue at a propònnere percursos ammajadores e esclusivos in su coro de s’Ìsula. In prus, at a bènnere annuntziada sa segunda editzione de ‘Noi camminiamo in Sardigna’, in programa dae su 3 a su 8 santugaine 2023.

S’Assessore de su Turismu at sutaliniadu s’importu de sos Caminos, de sos Logos de pellegrinàgiu e de sos Itineràrios ispirituales pro sa promotzione de s’internu de s’Ìsula, chi, paris cun sa proposta istadiale de su mare, podent contivigiare su bisu de un’Ìsula chi cheret bìvere de turismu totu s’annu. Su “Caminu de Santu Jacu” rapresentat un’importante ocasione pro sa Sardigna de avalorare su patrimòniu culturale suo e ambientale, oferende a sos visitadores un’esperièntzia ùnica e indimenticàbile a s’iscoberta de sa bellesa e de s’istòria de s’Ìsula.

 “Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

S’anturzu, una de sas genias animales prus raras in Sardigna, at fatu su torrada sua in sos chelos de s’ìsula a pustis de diversos deghènnios de ausèntzia. Difatis, unu giòvanu esemplare de gurturju anturzu, chi apartenet a sa populatzione  de su nord-otzidentale de s’ìsula, est istadu su protagonista de una essida intre sas domos de Biddesatu.

Segundu s’Agèntzia Regionale Forestas, custa etzetzionale escursione de su giòvanu anturzu est acabada calicuna die a oe a presu de Biddarega e Nuràminis, a probe de s’istatale 131. Inoghe est istadu recuperadu dae sos agentes de su Corpus Forestale e posca afidadu a su Tzentru de recùperu de sa fàuna agreste (CARFS) de s’Agèntzia Forestas, in Muristeni. A su presente, s’animale est suta osservatzione veterinària in su tzentru de recùperu.

Su cumportamentu de esploratzione, tìpicu de sos giòvanos anturzos, los ispinghet  a s’ispissu a printzipiare bolos assolados. Nointames, a càusa de s’inesperièntzia, custos bolos los podent pònnere in dificultade, esponende·los in perìgulu. Difatis si podent pèrdere o mòrrere de fàmene.

Custu giòvanu anturzu, naschidu ocannu, no est su primu a s’ispìnghere in custa zona, ca sos GPS impreados pro compidare sos anturzos interessados in su protzessu de ripopulamentu ant registradu una crèschida de sas essidas in s’ala meridionale de s’ìsula. Nointames, custa borta sa presèntzia sua est istada annodiada deretu e documentada ca est intradu in sa bidda.

Su progetu “Life Safe for the Vultures,” chi biet sa partetzipatzione de Forestas e vàrios colleboradores istitutzionales, punnat a estèndere sos resurtados otentos cun su pretzedente progetu “Under Grifon Wings” in su Nord Ovest de sa Sardigna, a su restu de s’ìsula. S’obietivu est su de garantire sa supravivèntzia pro meda tempus de s’anturzu in totu sa regione e de nde favorire sa torrada in sas àreas in ue est ausente dae medas annos.

Pro custu est istada creada un’istatzione de alimentatzione pro sos pugiones necròfagos in su cantiere forestale de Biddedatu, una voliera de ambientamentu dae ue in tres annos ant a essire unos chimbanta esemplares bènnidos dae s’Ispagna, un’osservatòriu, e un’àrea pro ispuntinare pro osservare sos anturzos. A su presente, sa volera acasàgiat 12 anturzos bènnidos dae s’Ispagna.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”