Enkaz cheret abarrare semper paris a su sarvadore suo. S’animale est istadu bogadu biu dae suta sas ruinas de una domo ruta a càusa de su terremotu in Turchia. Immoe non si cheret separare de chie nche l’at tiradu a foras dae cuddu inferru de carchina e de chimentu. Finas dae cuddas primas imàgines e fotografias chi sunt istadas ispartzinadas in sa retza, si biet custu gatu sùgiu, prenu de prùere e assustadu, istrintu tra sos bratzos de su sarvadore suo, istimendelu comente chi lu connoscheret de semper.

Fintzas Ali Cakas, custu est su nùmende de chie l’at sarvadu, s’est afetzionadu a issu. Ali est unu tziclista chi faghet parte de sa natzionale turca, chi comente a medas àteros est andadu a agiuare sos sucursos chi sunt acudidos a pustis de su disacatu mannu chi at corpidu sa natzione sua. Pròpiu iscavende tra sos cògios de sos palàtzios rutos, in un’istampu in mesu a su chimentu, at agatadu custu matzitu. Deretu a postu una fotografia in sos canales sotziales, narende chi si nde at a ocupare issu finas a cando no ant a èssere agatados sos meres. Su gatu est istadu agatadu in un’operatzione de sucursu a Nurdağı, unu distretu de sa provìntzia de Gaziantep. Ali l’at notadu in mesu a sos muros rutos de una domo. Su terremotu si fiat averguadu  129 oras a in antis, ma su matzitu,  istracu e fertu nche dd’at fata.

S’iscuadra de chirca e sucursu de su tziclista at sarvadu medas àteros animales, ma Enkaz est seguramente su chi est abarradu de prus in su coro de totus pro more de s’istima e sa reconnoschèntzia chi at mustradu in deretura a su chi nche l’at bogadu dae cussu fossu.  Custu raportu gasi ispetziale at fatu a manera chi su gatu immoe siat divènnida famada in sa retza, e in medas sigant su contu instagram de su sarvadores suo.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22