In su 2009, durante sa de 59 editzione de Sanremo, su binchidore de su fèstival est istadu Marco Carta. Sa cantzone sua  La forza mia, fiat divènnida in deretura famada tra sos giòvanos e giòvanas. Inoghe podimus bìere s’esibitzione sua.

A banda Marco Carta, sunt istados medas sos sardos chi ant partetzipadu a su fèstival. Su primu fiat istadu in su 1965 Vittorio Inzaina: 23 annos de Telti, posca sunt arribbados Marisa Sannia, sos Ice e sos Tazenda, sena iscarèschere Valerio Scanu e Mahmood.

Ma tra totus sas editziones, in su coro de sos sardos, seguru chi sa bìnchida de Carta est una de cussas chi est abarrada prus imprimida in sa mente. Marco Carta est nàschidu in Casteddu in su 1985 su 21 maju. Marco Carta possedit totus custas caraterìsticas pro divènnere unu cantante famadu: est dotadu fintzas de grandu fortza de ànimu e determinu pro lòmpere a totu  sos obietivos suos.

Sa mùsica divenit sa resone sua de vida, e unu modu pros’ isfogare, a pustis de sa morte de su babbu e de sa mama: su babbu morit cando tenet 8 annos; sa mama cando nde tenet 10. Marco creschet paris cun frade cun sos mannois de parte de mama. Coltivat cun passione su bisu suo.

A pustis de àere frecuentadu s’Istitutu Professionale pro Eletrotècnicos, Marco traballat comente  parruchieri in su salone de sa tziedda. Totu su dinare chi godàngiat lu impreat pro pagare sos billetes de aèreo pro andare a Roma, acanta faghet medas provinos.

Su 20 santugaine 2007, a pustis de medas sacrifìtzios, in fines Marco Carta benit ammìtidu in s’iscuadra de “Amici”. Su bisu s’est averguadu, mancari totu sas dificultades. Marco superat totu sas provas donende proa de su talentu artìsticu suo. A s’acabbu binchet s’editzione de su 2008 Marco Carta de “Amici” cun su 75% de sos votos.
Su passàgiu de Amici a Sanremo est belle che deretu. Difatis benit amìtidu a su fèstival e s’editzione de su 2009 est sa sua.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22