In su mangianu a tardu de eris, a pustis de sa presentada a s’ufìtziu Protocollu de su Comunu de is dimissiones de 9 de 16 consigieris comunales – 5 de s’opositzione e 4 de sa majoria – s’est serrada s’esperièntzia de sa Giunta ghiada dae Massimo Cannas.

Su primu tzitadinu, oramai ex sìndigu, fiat a segundu mandadu suo a sa ghia de sa tzitade de marina. Luego at a èssere numenadu unu cummissàriu istraordinàriu, chi at ghiare s’ente finas a eletziones noas.

Sa crisi in sa majoria est nàschida a pustis de sa detzisione de su sìndigu Cannas de protzedire cun unu rimpastu de sa Giunta in base a is acòrdios eletorales a is amministrativas de su 2019. Difatis chimbe assessores si diant èssere dèpidos intrare a su postu de àteros chimbe pro is duos annos e mesu conclusivos de legisladura.

Ma est craru chi su sèberu no est istadu atzetadu dae is assessores in càrriga, e lunis mangianu bator cumponentes de Giunta, paris cun is chimbe consigieris de opositzione , sunt andados dae unu notàriu pro firmare is dimissiones issoro.

S’iscòrriu polìticu est arribbadu in manera definitiva cando Cannas at azeradu sa Giunta e at nùmenadu a is chimbe assessores noos. Is Comunos sardos chi ant acanta s’at a dèpere votare in sas eletziones imbenientes, chi depet èssere galu fissada pro su 2023, in totu sunt 38.

S’ex sìndigu at naradu de èssere ispantadu, ma at pigadu atu de is dimissiones de is noe consigieris comunales sende chi faghet parte de sa dialètica de su Consìgiu comunale e issu at naradu de èssere rispetosu de is règulas de sa democratzia.
Difatis at afirmadu chi sa crisi chi si fiat aberta, ma non pensaiat chi s’esseret arribados a custu èsitu.

S’ex primu tzitadinu at auguradu chi chie at a arribbare a pustis de issu e de sa giunta sua, sighit a traballare in s’interessu ùnicu de sa tzitade.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Is rifornidores ant a abarrare serrados 48 oras de sighida, fintzas is autoservìtzios : dae custu merie, a cumentzare dae is 19 in totu sa rete ordinària e dae is 22 in is autostradas, finas a giòbia su 26 de ghennàrgiu – cun sa pròpiu diferentziatzione orària intre rete ordinària e autostradale -.

S’initziativa de is sindacados de is benzinajos est istada detzisa pro more chi su guvernu, imbetzes de abèrrere unu cunfrontu pro chistionare de is problemas beros de su setore, siat sighende a cuare is responsabilidades suas, faeddende de ‘trasparèntzia’ e ‘zonas de umbra’.

Faghende aici diat colare s’idea chi is benzinajos siant ispeculende subra su prètziu de su carburante, cosa chi is siglas sindacales negant cun fortza. A s’imbesse, su Codacons at fatu a ischire chi at a presentare un’espostu a sa magistradura contra sa serrada, ipotizende su reatu de “interrutzione de servìtziu pùblicu”.

S’assòtziu chi tutelat is consumadores at ispiegadu chi sa s’interrutzione de su servìtziu pro 48 oras, est una cosa grave meda, chi non podet èssere cunsideradu comente un’isciòperu de categoria ebbia, pro ite at a causare dannos mannos a is tzitadinos.

De sa matessi idea Assoutenti, chi pedit a is prefeturas e a su Garante pro is isciòperos de blocare sa protesta pretzetende is benzinajos e oblighende is distribudores a abarrare abertos. Difatis pro s’assòtziu de is consumadores sa detzisione de iscioperare pròpiu immoe est unu machine, cun tempus malu chi est corpende totu s’Itàlia e cun avisos de niadas chi interessant diversas regiones.

In riferimentu a custa protesta, sa presidente de su Consìgiu Giorgia Meloni, no at cambiadu idea, narende chi su guvernu no at mai pensadu de fàghere provedimentos pro incurpare sa categoria de is benzinajos, ma pro reconnòschere su balore de is gestores onestos. At agiuntu peri chi is controllos subra sa mèdia de su prètziu de su carburante no at iscoviadu no at provadu chi is prètzios nche sunt essidos in s’àera e chi ddoe sunt istadas pagas ispeculatziones. Pro custu s’esecutivu no at a torrare in segus e at a poderare sa s’òbligu de publicare su prètziu mèdiu, definende•ddu una detzisione sàbia.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”