Su Casteddu, a pustis de sa vitòria contra su Como, sàbadu coladu, in sa giorronada benente at a chircare àteros 3 puntos foras de domo, contra su Cittadella, in s’istàdiu Piercesare Tombolato.

Seguru at a èssere una partida istragosa pro is òmines de Ranieri, pro ite is vènetos ant bìnchidu s’ùrtima gara contra su Pisa, una de is iscuadras prus balentes de su campionadu, cun su resurtadu de 1 a 2 a s’Arena Garibaldi.

Pro is òmines de Ranieri at èssere importante sighire s’àndala cumentzada in custu 2023, pro regalare un’àtera bella satisfatzione a is tifosos sardos, comente sa gara a s’Unipol Domus contra is lombardos.

Is sardos ant a a afrontare is vènetos sena s’atacante Pavoletti, chi at marcadu sa prima rete in sa vitòria contra su Como, e is àteros infortunados: Mancosu, Obert e Deiola.

Galu non s’ischit chi is casteddajos ant giogare cun s’ischema bator-bator-duos o imbetzes o cun su tres-chimbe-duos, comente in s’ùrtima partida. Amus a bìdere, ma seguramente a in antis, in atacu, sa còpia at a èssere Lapadula e Luvumbu. Pro àteru sa formatzione non diat dèpere cambiare meda in cumparàntzia cun s’ùrtima disfida.

In custas dies, Ranieri at chircadu dae fàghere cumprèndere a s’iscuadra s’importu mannu chi tenet custa partida. Difatis contra su Cittadella is sardos s’ant a dèpere impinnare meda, mustrende torra unu bellu giogu de iscuadra.

In medas sunt cumbintos chi ant a lòmpere àteros giogadores pro afortiare su Casteddu. In tzitade s’est bidu su tzentrucampista Nainggolan, ma no est seguru chi su belgu at a torrare a giogare un’àtera borta cun is sardos. Fortzis at a lòmpere su defensore Chiriches chi pro immoe est tesseradu cun sa Cremonese, in càmbiu de Goldaniga.

Pro immoe su tzentrucampista Pereiro at saludadu sa Sardigna e su Casteddu e at  móvidu in a Uruguay pro acabbare dae giogare custa istajone cun su Nacional Montevideo.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Cras in Roma ddoe at a èssere s’interru de Gina Lollobrigida.

Sa tzerimònia at a cumentzare a ora de is 12.30 in Roma, in sa Crèsia de is Artistas, in pratza de su Pòpulu.

Pro s’atoressa morta a s’edade de 95 annos est istada aprontadu un’aposentu mortuàriu in sa Sala de sa Protomoteca in Campidògliu, e dae inoghe oe su baullu at a èssere carradu a sa basìlica.

S’istella de su tzìnema, comente aiat dispostu issa etotu, at a èssere interrada in sa bidda nadia sua, a Subiaco, acanta fiat nàschida in su 1927. Su comunu dd’at dedicadu una tumba monumentale, chi però no est galu pronta. Duncas pro s’ora at a èssere posta a s’internu de unu lòculu comunale, comente at decraradu su sìndigu Petrini.

In prus in consìgiu comunale at a èssere proposta s’intitulatzione de una pratza, a presu de su teatru tzitadinu, acanta aiat cumentzadu a resare.

Gina Lollobrigida est istada un’icona de su Tzìnema a livellu mundiale, bastas a pensare chi in 80 annos de carriera at resadu in prus de 60 pellìculas. At retzidu 7 David de Donatello, unu Golden Globe, 2 Nastros de Prata. Su nùmene suo est intre is istella de s’Hollwyood Walk of Fame de Los Angeles.

At a restare una de is atoressas prus amadas de semper, in sa carriera sua est istada dirìgida dae registas de cabbale comente De Sica, Monicelli, Germi e Soldati.

De seguru su film chi dd’at fata istimare de prus dae su pùblicu est istadu: “Pane, amore e fantasia”, in ue Lollobrigida interpretat “sa bersagliera”, una pitzoca chi aiat fatu ammachiare su maresciallu de is carabineris de Sorrento, Vittorio De Sica, dae pagu trasferidu a Abrutzu. S’òpera mastra aiat fatu unu milliardu e mesu de incassos. Pro more de sa resolutesa de s’atoressa, sìmile a cussa de sa protagonista de su film, su nomìngiu “bersagliera” ddi fiat abarradu a totu sa vida.

Lollobrogida, giai provada dae sa pelea legale cun su fìgiu, in cabudanni fiat istada ricoverada in s’ispidale pro àere segadu su fèmore, e dae tando no est prus torrada in transa.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”