Copa Itàlia Mma, sunt su bellu de chimbe sos pòdios otentos dae sos sardos in custa importante cumpetitzione a nivellu natzionale. In totale sos atletas sardos ant bìnchidu duos oros, una prata e duos brunzos.  Si tratat duncas de unu resèssida de cabbale sa chi nd’est essida dae su campionadu chi s’est tentu in  Roma, ancata at partetzipadu s’iscuadra tataresa de su Tarantini Fight Club.

Sa cumpetitzione de Copa Itàlia de Mma at dadu satisfatziones mannas a s’Ìsula. In sa de deghe editziones de su campionadu a torneos chi s’est tentu in su palatzu de s’isport de su Palattorino de Roma, chi podet bantare prus de batorchento  iscritos, s’iscuadra sarda chi tenet sa sede sua in Tàtari, sa de su Tarantini Fight Club Training Center, est resèssida a otènnere resurtados de cabale, portende sos atleta suos si positzionare in sos iscaleris prus artos  de su pòdiu.

Difatis s’iscuadra sarda est torrada a Sarddigna leende in bugiaca  duas medàllias de oro, una  medàllia de prata e duas medàllias de brunzu, donende in custu modu su contributu suo a sa vitòria de s’iscuadra natzionale cun base in Roma, sa Aurora,  chi aunit apare sas mègius iscolas italianas de custa disciplina ghiada e portada a in antis dae mastros comente Lorenzo Borgomeo e Riccardo Carfagna. Ma chie sunt sos atletas sardos chi ant conchistadu su pòdiu? Andamus a los bìere: Andrea Pazzona est oro in sa categoria 70 kg B/V, Medu Mbengue est oro in sos 57 kg B/V. Matteo Dore, imbetzes, in sos assolutos junior 66 kg at conchistadu sa medàllia de prata. Morgan Capocci in sos 66 kg B/V at otentu su brunzu, paris cun Luca Casu in sos 70 kg tzinturas biancas.

A fàghere figura bella sunt istados fintzas sos noitolos Andrea Piga, chi però at pèrdidu unos cantos puntos in sos curtos de finale, e Giuseppe Cannas, chi issu puru a dolu mannu at cuntzèdidu puntos in sos cuatos in su desafiu contra a su campione detentore de su tìtulu. Duncas podimus nàrrere chi sos atletas sardos podent torrare a domo satisdfatos pro sos resurtados otentos. Satisfatos meda pro su traballu peri sos allenadores Mario Piroddu, Franco Fois, Silvano Pais e Angelo Tarantini.

“Progetu finantziadu cun s’Avisu Pùblicu IMPRENTAS annualidade 2021-2022”

Su padel est un’isport chi est naschidu in Mèssicu in sos annos 70. In su 1969 in Acapulco su messicanu Enrique Corcuera, cherende cuncordare unu campu de paddle tennis in domo sua, aiat cuntzepidu s’idea de cunsiderare sos muros comente parte integrante de su campu de giogu. Corcuera posca aiat reguladu su giogu nou e l’aiat mutidu padel. Su padel est unu de sos isport prus populares in Amèrica Latina, mescamente in Argentina, mentras in Europa sa natzione in ue custu isport tenet apassionados est s’Ispagna, cun 4 milliones e mesu de praticantes amatoriales, ma est praticadu meda fintzas in Portogallu e Isvètzia.

A pagu a pagu est cumentzende a èssere praticadu in totu su mundu, fintzas in Sardigna. Pro nde ischire de prus amus dimandadu calicuna informatzione a s’allenadore Luca Ghiani

“Su padel — at naradu Luca — dae isport disconnotu est divènnidu unu de sos prus praticadu in custu momentu, chi cun probabilidade at a arribbare a èssere atzetadu fintzas comente disciplina olimpiònica.  Sa recherta semper prus manna est faghende a manera chi sos servìtzios e sas istruturas acapiadas a custa pràtica siat aumentende meda in totu su mundu.  A custu isport, difatis si podent acurtziare medas persones,  megiorende totu sos aspetos connètidos a sa pràtica chi  non recheret medas capatzidades atlèticas comente podet acontèssere in àteras disciplinas. In prus non bolet nemmancu  atretzaduras chi costant meda, ma podimus nàrrere chi est a sa portada de totus.
Colat a isport elitàriu pro more ca sunt artos meda sos costos pro afitare sos campos e pro  more chi rechedet medas letziones. In prus, pro chie cheret lòmpere a unu livellu bonu, serbit acostiare a s’isport fintzas una dieta echilibrada chi tèngiat contu de sas calorias”.

Pro serrare, Luca at naradu chi ocannu sa punna sua est de si megiorare de prus in custu isport fintzas comente allenadore, pro custu at a torrare a Ispagna pro imparare semper prus dinàmicas e metodologias de insegnamentu.
Esistint diversos tzentros acanta praticare custu isport e sa calidade issoro si mesurat segundu sos servìtzios chi ponet a disponimentu, chi si podent partzire pro livellos, su de base, chi donat servìtzios igiènicos e de una segreteria, a su segundu livellu, chi donat sa possibilidade de papare e servìtzios de recreu, e su tertzu livellu chi podet pònnere a disponimentu totu su chi pertocat su cuntestu agonìsticu.