Est istadu un’apuntamentu ispantosu a beru, siat pro s’ambientatzione galana e ùnica, siat pro sa presèntzia de persones meda interessadas a su setore, siat pro sa cantidade de  màndigos tìpicos de sa Sardigna. Su Cannonau protagonista in Sydney de s’eventu Hunters Hill Sailing Club, organizadu dae s’Assòtziu Sardu de Sydney. S’ocasione est istada cussa giusta pro presentare a su publicu australianu is produtos fatos in s’ìsula nostra, comente su pane carasau, su recotu, e mescamente su cannonau, su binu fatu cun s’àgina prus antiga e fortzis prus connota de sa Sardigna.

In s’eventu sunt istados espostos e tastados medas màrchios de Cannonau chi ant ammajadu is presentes  cun sos nuscos e cun sos sabores ùnicos issoro. A fàghere de maere de domo ddoe fiant, a banda sos rapresentantes de s’Assòtziu de sos sardos in Sidney, s’enòlogu, Piero Cella, de sa “Cantina Quartomoro, su maere de sa Cantina Mulargiu de Mamujada Francesco Mulargiu e Matteo Locci, su maere de sa Cantina Locci-Zuddas de Casteddu”.

A sa degustatziones ant leadu parte fintzas imprendidores sardos chi istant in Austràlia, comente su propietàriu de su St Clement Estate & Lillino’s Trattoria and Bar, Luigi Pinna, chi unos cantos a oe at tentu s’idea de pònnere una bìngia in sa “Hunter Valley”.  Un’arriscu mannu, ma fintzas una disfida chi at permìtidu a Pinna de connòschere una realidade chi non connoschiat, e fintzas de si fàghere connòschere issu comente imprendidore in cussas cussòrgias. Difatis dae paritzos annos sunt medas sas ditas chi produent binu de totu su mundu chi sunt investende in Austràlia pro conchistare una gìtula de unu mercadu chi amus a definire in contina evolutzione.

Sa serada de degustatzione est istada aberta dae unos cantos professionistas e espertos de su setore vitivinìculu chi ant allegadu a unu pùblicu interessadu meda de is caraterìsticas de sos binos presentes. Su Cannonau, a manera òvia, est istadu su protagonista, sende chi a banda su sabore, su gustu e sa calidade sua, est connotu peri pro èssere su binu de is tzentenàrios de sas biddas nostras. Pro serrare, s’eventu at tentu una resessida manna. Unu bellu billete de bisita pro is produtos de s’enogastronimia sarda.

“Progetu finantziadu cun s’Avisu Pùblicu IMPRENTAS annualidade 2021-2022” 

Coldiretti Casteddu, at fattu una proposta apprettosa a sos sindigos de sa Sardigna de su mesudie orientale: dimandare sa utta de calamidade naturale po cajone de s’assuttura grae meda chi est devastande s’iscrocca dae paritzos meses.

Custu appellu est bistadu fattu cun d’una littera mandada a sos primos tzittadinos de 25 Comunes de cussa zura, cun s’intentu de bischidare sas comunidades e alcansare unu accottu praticu. In sa littera mandata, su presidente e su direttore de Coldiretti Casteddu, Giorgio Demurtas e Luca Saba, evidentziant sa drammaticidade de sa situassione chi est imbrinucande sos massajos e sos pastores de sa regione.

Sa mancantzia de s’abba po parizzu tempus at cajonadu una crisi chi non tenet cabidianu, cun dannos mannos meda a sa laurantza e a sas attividades de allevamentu. Addaenantis a custa emergentzia, Coldiretti evidentziat s’importantzia de si interessare a sa lestra e cun detzisione, uninde sas fortzas cun sos sindigos de sos Comunes interessados, po apprettare sa Regione a declarare sa utta de calamidade naturale.

Sigundu Coldiretti, declarare sa utta de calamidade est necessariu po alcansare sos benes chi serbint a su sustentamentu de sas comunidades de sa campagna e sas attividades de produssione insoro, chi sunt bistadas accroppadas meda dae una crisi chi paret non dare asseliu. Sos massajos e sos pastores, chi sunt sos colondos de sas comunidades locales, sunt in d’una situassione critiga meda, cun meda problemas de colomia de oe e de cras.

In manera particularee, sa zura de sa Sardigna de su mesudie Orientale est bivinde una situassione critica, cun meda pastores chi teppent acomettare dannos dae s’assuttura e problemas po comporare sa provenda po cumpensare sa mancantzia de sos appassiadorzos. Custu at cajonadu cunseguentzias chi ant devastadu sos fatturados de sas dittas. Coldiretti, narat de tennere cunfiantza in sa sensibilidade de sos sindigos e dimandat una assione lestra meda dae parte de sas istitussiones po azzuare sas dittas in custa situassione drammatiga meda.

S’organissasione addurat disposta a dare sa collaboratzione sua a tottu sas amministrassiones chi anta a partetzipare po s’interessiu e su benessere de sas comunidades locales. Sos pensamentos po su motivu chi sa situassione potat diventare pius grae, sunt fundadas, tenende in cunsideru puru s’arriscu po sos cultivos de s’istiu e de s’attonzu, pustis de sas difficultades passadas in s’iberru e su beranu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22