Su pitzocu de Crabonàrgia aiat tentu un’intzidente frontale cun una mototziclista tedesca in sa Provintziale 17. A pustis de su ricòveru de urgèntzia, s’est mortu in su Brotzu. Disisperados su babbu e sa mamma paris cun sos amigos chi in sas retes sotziales ant iscritu: “Amus isperadu finas a s’ùrtimu momentu de ti pòdere torrare a bìdere alligru e sena pensamentos!”

Non che l’at fata Gabriele Viel. A pustis de una die e mesu chi fiat lutende in su repartu de Rianimatzione de s’ispidale Brotzu de Casteddu, s’est mortu. Su pitzocu de 19 annos de Crabonaxa aiat tenu un’initzedente lègiu meda in s’Istrada Provintziale 17, a s’artària Sa Ruxi. Gabriele fiat guidende sa moto cosa sua cando de suncunas nch’est acabbadu a pitzu de un’àtera mototzicleta ghiada dae una turista tedesca, chi pro fortuna non s’est fata nudda.  In deretura is mèigos ant bidu chi is cunditziones de su giòvanu fiant  graves meda e mancare totu is provas pro lu poderare in vida non sunt resèssidos a lu sarbare. In bidda fiat connotumeda, gosi comente su babbu  Diego e sa mama Renata. Aiat medas amigos chi comente s’est ispainada sa noa mala de sa morte ant prenadu sos mèdias sotziales de messàgios tristos de condulèntzia.

Su cunsigeri comunale Enrico Cogoni at postu in sa retza una fotografia de su giòvanu acumpangiada dae unu messàgiu commovente a beru:  “Gabriele, ognunu de nois isperaiat cun totu su coro pro tene, isperaiat de ti torrare a bìdere alligru e sena pensamentos comente est giustu chi siat in s’edade tua. Non b’at faeddos pro su chi t’est capitadu. Un’abbratzu mannu a totu sa famìlia tua”. Pro rispetu, in sinnu de lutu, est istada annullada sa serada de gara de poesia campidanesa chi fiat in programma in pratza Giovanni XXIII, unu de sos apuntamentos acapiados a sa festa in onore de Santu Raffaele Arcangelo. Matteo Frau, s’organizadore e de sa gara poètica at iscritu in sos mèdias sotziales: “Ispero chi cumprèndais su motivu de custa detzisione, ma da in antis a sa morte de unu pitzocu de 19 annos, dae in antis una tragèdia gasi trista pro totu sa comunidade de Crabonaxa, nois non tenimus gana de sighire a festare”.

“Progetu finantziadu cun s’Avisu Pùblicu IMPRENTAS annualidade 2021-2022”

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22