Su pitzocu de Crabonàrgia aiat tentu un’intzidente frontale cun una mototziclista tedesca in sa Provintziale 17. A pustis de su ricòveru de urgèntzia, s’est mortu in su Brotzu. Disisperados su babbu e sa mamma paris cun sos amigos chi in sas retes sotziales ant iscritu: “Amus isperadu finas a s’ùrtimu momentu de ti pòdere torrare a bìdere alligru e sena pensamentos!”

Non che l’at fata Gabriele Viel. A pustis de una die e mesu chi fiat lutende in su repartu de Rianimatzione de s’ispidale Brotzu de Casteddu, s’est mortu. Su pitzocu de 19 annos de Crabonaxa aiat tenu un’initzedente lègiu meda in s’Istrada Provintziale 17, a s’artària Sa Ruxi. Gabriele fiat guidende sa moto cosa sua cando de suncunas nch’est acabbadu a pitzu de un’àtera mototzicleta ghiada dae una turista tedesca, chi pro fortuna non s’est fata nudda.  In deretura is mèigos ant bidu chi is cunditziones de su giòvanu fiant  graves meda e mancare totu is provas pro lu poderare in vida non sunt resèssidos a lu sarbare. In bidda fiat connotumeda, gosi comente su babbu  Diego e sa mama Renata. Aiat medas amigos chi comente s’est ispainada sa noa mala de sa morte ant prenadu sos mèdias sotziales de messàgios tristos de condulèntzia.

Su cunsigeri comunale Enrico Cogoni at postu in sa retza una fotografia de su giòvanu acumpangiada dae unu messàgiu commovente a beru:  “Gabriele, ognunu de nois isperaiat cun totu su coro pro tene, isperaiat de ti torrare a bìdere alligru e sena pensamentos comente est giustu chi siat in s’edade tua. Non b’at faeddos pro su chi t’est capitadu. Un’abbratzu mannu a totu sa famìlia tua”. Pro rispetu, in sinnu de lutu, est istada annullada sa serada de gara de poesia campidanesa chi fiat in programma in pratza Giovanni XXIII, unu de sos apuntamentos acapiados a sa festa in onore de Santu Raffaele Arcangelo. Matteo Frau, s’organizadore e de sa gara poètica at iscritu in sos mèdias sotziales: “Ispero chi cumprèndais su motivu de custa detzisione, ma da in antis a sa morte de unu pitzocu de 19 annos, dae in antis una tragèdia gasi trista pro totu sa comunidade de Crabonaxa, nois non tenimus gana de sighire a festare”.

“Progetu finantziadu cun s’Avisu Pùblicu IMPRENTAS annualidade 2021-2022”

Sèquestru mannu de 2 milliones de euros in Sardigna: colpu a su trafficu de droga

In paritzas provincias de Sardigna est in cursu una operatzione manna de sa Politzia de Istadu inue si chircat de contzàstare su trafficu de droga. Su Tribunale de Casteddu at ordinadu unu maxi- sèquestru de benes de prus de 2 milliones de euros, fatu a duas persones cunsideradas impricadas in unu sistema cumplessu de narcotràficu ativu dae tempus in s’isula.

Custu provvedimentu, chi rapresentat una de sas operatziones prus mannas de sos ùrtimos meses in sa luta contra sa criminalidade organizada in Sardigna, at leadu a su sècuestru de impresas, partes de sotziedales, immòbiles, màchinas de luxu e medas cuntos bancàrios e finantziàrios. Totu sos benes chi, segundu su chi ant iscobertu sos investigadores, siant bistados racolidos in su tempus gràtzias a sos balanzos de sas atividades illegales ligadas a su negotziu e a sa distributzione de sustàntzias istupefacentes.

S’atzione est su resurtadu de una atividade de investigatzione e de controllu intensa de sos benes chi at permìtidu de torrare a fraigare su frussu de su dinari e sos investimentos ligados a sos duos indagados. Sas verìficas ant mustradu una differèntzia manna intre sas intradas declaradas e sos benes chi in realidade teniant, cosa chi at ispintu sos zuighes a bintrare in atzione cun medidas de prevenzione patrimoniale.

S’operatzione est su frutu de atividades investigativas cumplessivas in matèria de medidas de prevenzione patrimoniale allineadas a livellu natzionale dae su Servìtziu Tzentrale Anticrimine. S’intentu est iscumbustare s’impèriu econòmicu fraigadu cun sos balanzos de su narcotràficu e torrare a sa comunidade sos benes furados dae s’organizatzione criminosa.

Sas investigatziones, segundu su chi benit a sa lughe, si ponent in unu cuntestu prus mannu in sa luta a sas organizatziones criminosas chi operant in su trafficu de droga intre sa Sardigna e su restu de s’Itàlia.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”