Pro su de sete annos sa BJJ Summer Week — organizada dae s’associatzione S’Animu cun su contributu de primore de s’assessoradu regionale de su Turismu e de su Comunu de Casteddu — at a batire a Casteddu chentinaias de isportivos, cun acumpangiadores e famìlias: sunt prus de 700 is iscritos a is garas chi dae su 18 a su 25 de cabudanni s’ant a fàghere in su Palaboxe, in su palatzetu de bia Rockefeller, in s’impiantu de Monte Mixi. Sa manifestatzione dd’ant presentada is organizadores, Emanuele Frongia e Daniele Pisu, cun s’assessore regionale de su Turismu, Gianni Chessa, e s’assessore a s’Isport de su Comunu de Casteddu, Andrea Floris.

Fintzas in custa editzione sa Summer Week at a èssere una grande ocasione, pro Casteddu e totu s’àrea metropolitana, pro si pònnere a beru in vetrina. Hotel, B&B e fintzas in is domos in s’àrea metropolitana ant a donare acatu a sa comitiva de su BJJ, “cun sa punna se semper de fàghere connòschere su territòriu, is bellesas de sa Sardigna e, ocannu, fintzas is sabores locales, cun una expò pro is atletas, cun produsidores de binu e produtos tìpicos”, ant nado is organizadores.

Nch’est chin est lòmpidu a primu borta e àteros benent de sete annos, acabbada sa Summer Week, passat is ferias a arròlliu in s’Ìsula. S’apuntamentu cun su BJJ est un’addòbiu perfetu intra isport e turismu. S’annu coladu, in su prenu de s’acorru pro su Covid19, sunt lòmpidas acanta de milla persones, intra atletas, familiares e organizadores, pro unu de afàrios in su territòriu de acanta de 800 milla èuros. Ocannu sa punna est cussa de ci passare su millione de èuros. Intra is novas de ocannu, nch’est s’apuntamentu cun sa XXI editzione de Polaris, torneu de Jiu jitsu e grappling intra is prus de importu in su mundu, in programma su 24 de cabudanni benidore in Casteddu, in sa Summer Week. Ocannu sa seletzione at a èssere fintzas pro atletas sardos chi ant a pagare parte a sa manifestatzione internatzionale chi at a tènnere sa partetzipatzione de campiones meda, iscedados intra is mègius professionistas de su setore.

“Su Polaris — ant ispricadu Frongia e Pisu — est nàschidu in 2015 in Inghilterra e ammustrat de semper unu must de su jiu jitsu professionista e de is torneos invitational internatzionales. Custa cumpetitzione tenet unu regulamentu ispetzìficu chi avalorat sa sutamissione a comente punna prus arta de sa luta cunforma a is puntos e a is bantàgios clàssicos. Custu tipu de regula glòriat sa luta dinàmica e non permitit is situatziones de firmada o de passividade, regalende un’ispetàculu chena pretzedentes a chin assistet”. S’addòbiu de Polaris at a èssere fatu in s’Auditòrium de su Conservatòriu “Pierluigi da Palestrina” de Casteddu.

Sa manifestatzione de artes martziales ocannu at a èssere prus rica pro more de s’acòrdiu cun sa prataforma UFCpass, su canale tv ispetzializadu in artes martziales mistas urtimadas fight championship, chi at a portare s’immàgine de sa Sardigna in su mundu, a comente a fàghere sa manifestatzione chi, dae sa fundatzione, no est mai essidu de s’Inghilterra e de su Galles (chi ant tentu semper totu is editziones).

“Progetto finanziato con l’Avviso Pubblico IMPRENTAS annualità 2021-2022”

S’abberat unu cambiu chi furriat sa cara de sas giannas de su Casteddu e Napoli: Elia Caprile de su 2001, si che andata dae su Napoli a su Casteddu cun sa regula de su prestitu fintzas a sa fine de s’istagione isportiva 2024- 25, cun dirittu de riscattu.

In su mattessi tempus, Simone Scuffet, de su 1996, dassat sa Sardigna po arribare in Campania, issu puru cun sa regula de su prestitu fintzas a sa fine de su campionadu.

S’arrivu de Caprile in Casteddu est bistadu retzidu cun galabera meda dae una parte de sos sustenidores de sos rujublu. Su 6 de bennarzu, in s’aeroportu de Elmas, una deghina de sustenidores at datu su benennidu a su zovanu porteri veronesu. Intre tiradas e fottografias de ammentu, calicunu li at ammentadu brullande s’importantzia de Leonardo Pavoletti po sa pigada de su Casteddu in serie A, cando propriu unu goal de s’attaccanta aiat cundennadu su Bari de Caprile in sos play off.

Sa die sua est sighita cun sas visitas dae sos duttores, sa frimma de su cuntrattu e su seperu de sa maglia numero 25. Tottu praticas chi sun bistadas fattas cun lestresa meda. S’acchistu novu est bistadu giai in sos disignos de allenamentu e tiat podere giogare sappadu in sa partida contra su Milan.

Naschidu in Verona, Caprile est creschidu in sas novadiles de su Chievo- Verona. Sa carriera sua est divennida internatzionale cando, in su mese de bennarzu 2020, est bistadu comporadu dae sos inglesos de su Leeds United. Pustis de cust’esperientzia at attiradu s’attentzione de medas isquadras de serie A.

In su mese de triulas de su 2023, est bistadu comporadu dae su Napoli, chi peroe che l’at mandadu in presta a s’Empoli po li garantire continuidade. Cun s’Empoli, guidadu dae Davide Nicola, at mustradu tennica e personalidade mannas meda, arrivande a parare fintzas unu rigore a Viola, chi oe est unu cumpanzu suo in su Casteddu. Como, Caprile est giammadu a faghere fruttare cust’esperientzia po dare su contribbudu suo a sa cursa de sos rujublu po si salvare.

Po Simone Scuffet,imbetzes, si tratta de unu adiosu a sa Sardigna pustis de un’stagione e mesu. S’ex porteri de s’Udinese, arrivadu in Casteddu in su 2022, aiat conchistadu su logu de titolare in s’istagione passada pustis de essere bistadu allocu. Cust’annu, peroe, carchi prestassione chi no aiat cumbinchidu e sa cuncurrentzia de s’albanesu Sherri, li aiant fattu bivere momentos cumplicados meda.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22