13 annos  a pustis, Marco Mancosu torrat a Casteddu pro si torrare a pònnere cuddos colores e bìvere cun probabilidade s’ùrtimu disafiu de sa carriera.

Marco Mancosu est naschidu in Casteddu su 22 austu de su 1988. Artu 180 cm pro 77 kg, at comintzadu comente  esternu de tzentrucampu. Est frade minore de Matteo, atacante, chi si fiat laureadu capucannoneri de sa Sèrie B 2013-14 cun sa màllia de su Tràpani a pustis de meda gaveta intre sos Diletantes in Sardigna. Su prus piticu de sos frades Mancosu, Marcello, est fintzas issu giogadore de fùbalu professionista. Marco at fatu totu sa trafila in sas giovaniles de sa natzionales, finas a esordire cun s’Under 21 gràtzias a sa mutida de Casiraghi. Cojuadu cun Valeria e babbu de Gioia, naschida in su 2015.

Est unu produtu de sas giovaniles de su Casteddu, chi at bìvidu un’inghitzu de carriera in sa prima iscuadra meda importante: s’imbucada in Sèrie A contra s’Ascoli in su 2007, infùndidu dae unu gol, e deghe presèntzias in s’istajone sutzessiva. Posca su prèstidu a su Rimini e sa torrada a sa domo, abbandonada definitivamente in su 2009 cun ulteriores duos getones in campionadu. Dae tando at comintzadu unu giru de Itàlia chi l’at giutu a Empoli e in tzìrculu de su Sud comente Siracusa, Benevento, Casertana e Lecce. S’ùrtima parèntesi est istada a sa SPAL, serrada eris cun s’adiosu cuncordadu cun sa cungrega ferraresa, nointames su cuntratu in èssere.

Marco Mancosu est un’elementu dotadu meda dae su puntu de bista tècnicu, capatzu de giogare comente  mesuala, trecuartista o punta agiunta. Puru non tratende·si de un’atacante puru, su puntègiu suo faeddat a solu: 97 retes ufitziales intre campionadu e Copa, in 449 addòbios chertados (prus 12 garas in sos isparègios cun unu gol marcaduadu). Una de sas peculiaridades suas est s’abilidade subra de sos tiros piatzados, in particulare dae su dischetu: duncas, faeddamus de unu giogadore prontu a marcare su gol.

S’allenadore de su Casteddu Fabio Liverani e Marco Mancosu si connoschent bene meda, ca su calciadore est istadu su capitanu suo in sa fortunada esperièntzia de Lecce: su perìodu prus importante in sa carriera de Marco, dae cannoneri agiuntu (50 retes ufitziales in chimbe istajones, de sas cales 14 in sa Sèrie A 2019-20). Naturale chi in issu s’allenadore bidat unu potentziale trascinadore in sa aventura noa sua in Sardigna. B’at meda  curiosidade pro iscobèrrere in cale positzione su tècnicu l’at a impreare e su ruolu suo in sas gerarchias de s’iscuadra sarda.

“Progetu finantziadu cun s’Avisu Pùblicu IMPRENTAS annualidade 2021-2022”

Sardigna in crisi de naschidas chi sighint a minimare.

Secundu su chi narat s’Istat, sa Sardigna sighit a minimare in sas naschidas, cunfirmandesi intre sas Regiones italianas pius corpadas dae custu problema negativu. S’isula accomettat una difficultade sempre pius manna in su cambiu de s’ingendra, cun semper pius pagos zovanos e un’imbezzamentu de sa populatzione chi arriscat de compromittere su tempus benidore socio-accolimicu de sa Regione.

S’edade media de sas mamas sighit a pigare,meledande s’incrinu a attrassare sa madernidade po motivos ligados a sa carriera,a sos problemas accolomicos e sa difficultade de ponnere impare sa vida familiare e proffessionale. Sa minimada de sas naschidas est su risurtadu de medas motivos chi si intritzant pari pari. Dae una parte, s’emigrazione de sos zovanos bogat a s’isula pessonas in edade de tennere fizzos, chi chircant tribagliu e un’istabilidade pius segura in atteros logos. Dae s’atteru,sas difficultades accolomicas e sa mancanzia de politicas balidas de azzudu a sas familias faghent divennere semper pius diffitzile de tennere fizzos.

Custu fenomenu, si non si faghet carchi cosa, arriscat de tennere conseguenzias fungudas supra sa vida sotziale e accolomica de s’isula, creande problemas supra sa disponibilidade de servitzios pubbricos, subra su sistema sanidariu e s’istrutzione.

Sos afficos de su tempus benidore mustrant sa necessidade de interventos pretzisos: agguantare sas naschidas e creare condissiones de favore po faghere addurare sos zovanos in s’isula. Solu po mesu de politicas balidas e un’impignu de tottus at a essere possibile cambiare custa ingrina e garantire unu tempus benidore pius firmu a sa Sardigna.Sa crisi de sas naschidas de s’isula non est solu una cosa tzerta e sigura,ma unu signale craru de sa necessidade de torrare a pensare a s’appitzigu intre tribagliu,familia e sotziedade po fraigare un’afficcu nou de creschida e isviluppu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”