Sunt istadas custas sas primas paràulas de su Presidente de sa Repùblica Sergio Mattarella, in pessu isbarcadu in s’iscalu militare de su nord ovest de sa Sardigna. Faeddos prenos de ammiratzione pro sa tzitade catalana, in ue pro su segundu annu de fila de pare su Capo de s’Istadu at a colare una deghina de dies de vacàntzia pro si pasare, a largu dae su trèulu de una campagna eletorale pro sas polìticas chi oramai est aviada mancari non siant istadas ancora presentadas in manera ufitziale sas listas.

Unu passàgiuformale chi at a èssere fatu in su 21 de austu, in sa die chi su Presidente diat pòdere lassare s’Ìsula pro torrare a Roma, francu càmbios de programa. In s’ora pro b’at a èssere unu perìodu de pasu e calicuna bìsita privada. Su programa de sas vacàntzias at a èssere detzìdida die cun die e pro motivos de seguridade. S’ùnica cosa segura est chi at a allogiare in sa foresteria de s’Aereonàutica militare a s’internu de su Parcu de Portu Conte, in ue est arribbadu deretu a pustis de àere retzidu su bene bènnidu ufitziale a s’arribu suo, custu merie, in s’iscalu militare dae sa prefeta de Sàssari, Paola Dessì, dae su Capo de Istadu Majore de s’Aereonàutica, generale de iscuadra aèrea Luca Goretti, dae su cumandante de su Distacamentu aeroportuale de S’Alighera, su Ten. cun su. Domenico Cecco, dae su sìndigu Mario Conoci e dae sas càrrigas provintziales de sas fortzas de politzia.

Su Capo de s’Istadu s’est istentadu unos 30 minutos a s’internu de s’aerostatzione. Su presidente at chistionadu pedende noas subra s’andamentu de s’istajone istiale, ammustrendesi cumpragente pro sa situatzione positiva de su turismu. A l’acumpangiare in sas vacàntzias sardas, sa fìgia – a sa cale su sìndigu at regaladu unu matzu de frores – e sos familiares suos.

Pagas essidas, meda pasu e mare: est custu su programma de Mattarella chi, in risposta a s’invitu de su sìndigu in munitzìpiu at fatu cumprèndere chi s’at a iscostiare pagu dae sa residèntzia sua de Portu Conte. Sa permanèntzia sua in S’Alighera non diat dèvere prevìdere perunu atopu ufitziale. No ant a mancare, imbetzes, sas essidas in barca e fintzas forsos sa partetzipatzione a sa missa de Mesaustu. Tra sas bìsitas nche diant pòdere èssere cussa a su Museu archeològicu, a su Nuraghe Palmavera, a sa Necròpoli de Anghelu Ruju e a su faru de Capo Caccia.

“Progetto finanziato con l’Avviso Pubblico IMPRENTAS annualità 2021-2022”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22