Elisabetta Canalis est colende is bacàntzias suas  in Sardigna. S’atoressa de orìgine otieresa est torrada a agatare sa Lida de Terranoa. “Fintzas ocannu Eli at poderadu sa promissa sua e est bènnida a nos agatare – at naradu in unu comunicadu sa Lida, setzione de Terranoa, -. Ogni bia non faghet praghere a la bìere e issa puru est cuntenta e bregiosa de bènnere a nos agatare. Est meda interessada a sa salude se sos callutzos abbandonados e  a su traballu chi faghent sos operadores nostros. Su grandu coro suo fintzas custa borta at lassadu su sinnu“.

Canalis at contadu s’esperièntzia sua in sa Lida cun faeddos cumoventes in sos canales sotziales cosa sua: “Eris so istada a fàghere bìsita a su canile de sa Lida de Terranoa. Non potzo descrìere sos sentidos chi apo proadu bidende custos canes e gatos chi sunt istados sarvados dae s’indiferèntzia e de sa malesa de tzertas persones“.

 “A palas de ogna cane b’at un’istòria de contare: unos cantos sunt istados cunfiscados a persones chi los acapiaiant a cadenas de 15 cm, àteros arribbant dae campos nòmades e tenent sinnos de brugiaduras– faeddemus de calleddos de pagos meses -. Àteros benint comporados a persones cun problemas mentales chi a dolu mannu non los podent pompiare e arribbant a cunditziones malas, àteros ancora sunt canes chi arribbant dae su sartu, prenos de errigines e maladias, àteros sunt sos canes de allevamentos chi non sunt istados bèndidos, e chi benint imbolados ca oramai tropu mannos”.

S’invitu de sa Canalis est cussu de bipensare bene e de riflètere in antis de adotare unu cane: “Bos pedo petzi de riflètere bene in antis de pigare unu cane: sos canes insùgiant, apeddant e distruent sabatas e mòbiles in sos primos meses de vida si non si tenet sa passèntzia de lis imparare a istare in domo. Sos canes creschent. Sos canes tenent bisòngiu de caminare cada die. Sos canes s’ismalaidant comente a nois etotu e tenent bisòngiu de unu veterinàriu. Sos canes cherent istare cun nois e bolent cumpangia nostra. Sos canes non sunt unu giogu. Diais chèrrere biagiare cun su cane bostru? Devides ischire chi sas cumpangias aèreas non sunt collaborativas e pro su prus non los cherent in sos aèeros e chircant 1000 iscusass. Andade a bisitare unu canile e si a beru bolides unu cane o unu gatu , los ais a agatare in cue  a bos isetare“, concruit Elisabetta Canalis.

“Progetto finanziato con l’Avviso Pubblico IMPRENTAS annualità 2021-2022”

Claudia Comida est sa presidente regionale noa de Sib-Confcommercio (Sindacadu Italianu Balneàrios). In prus de Claudia Comida a sa ghia de su sindacadu SIB Sardigna, su diretivu regionale at elègidu fintzas a Danilo Cacciuto, vitzepresidente vicàriu, a Gianni Azara e a Paolo Manca cunsigeris de Giunta. A sa riunione de su diretivu regionale est istada fata in Nùgoro e b’at pigadu parte in  videocunferèntzia su presidente natzionale de su sindacadu Sib, Antonio Capacchione.

“So cuntenta meda e torro gràtzias a sos collegas chi m’ant bòlidu afidare custu incàrrigu importante. Ringràtziu meda peri a su presidente dimissionàriu pro su traballu mannu chi at fatu finta a como. Issu at a abarrare una risursa pretziosa pro totu su cumpartu – at naradu Comida – Pro mene at a èssere un’onore mannu su de pòdere rapresentare sa Sardigna e prus che totu de de fàghere connòschere e promòvere sos primores suos”.

Su Sindacadu italianu balneàrios s’est formalmente costituidu su 14 nadale 1960 e, a traessu de sa Federatzione Italiana Pùblicos Esertzìtzios (FIPE), aderit a sa Confcommercio – Confturismo. In custa setzione est possìbile lèghere totu sos artìculos chi riguardant su Sib-Confcommercio.

Claudia Comida est sa  titulare de su ristorante La Capannina. S’annu coladu, pro su segundu annu de fila de pare, Restaurant Guru l’at assignadu su reconnoschimentu de “Mègius Ristorante de Pisci in Tzitade”.

Restaurant Guru còmpudat totu sas retzensiones lassadas dae sos impitadores in sas printzipales prataformas (Trip, Facebook, Google etc) e in base a sa mèdia prus arta, assignat custos atestados.

Su ristorante de La Capannina s’agatat de fronte a unu de sos areniles prus famados de s’Ogiastra. In su 2022 at otentu fintza sa Bandiera Blu paris cun àteras localidades de sa proivìntzia de Nùgoro  e de s’Ogiastra, comente -sas marinas de Portu Frailis, Orrì-Foxilioni, Muscì (il Golfetto), Lido de Orrì (I e II Ispiàgia), Cea, Santu Millanu. E sa de Barì, cun sas marinas de Buca de Strumpu/Turre de Barì/Sa Marina.

“Progetu finantziadu cun s’Avisu Pùblicu IMPRENTAS annualidade 2021-2022”