Su diretivu de su Tortolì Basket est istadu rinnovadu e sa presidente noa est Alessandra Ferreli. “Pro mene est unu desafiu chi bògio afrontare cun passione e impinnu, in unu perìodu istòricu comente su chi semus bivende chi est aici particulare pro sos giòvanos nostros, chi tenent bodòngiu de seguresa e de tzertesas”

A s’agabbu de un’annu remenosu e cumplicadu concruidu su 22 de maju cun sas finales regionales under 14 in su Pala Tenda de Zinnias, si rinnovat su Cda de s’Asd Basket Tortolì. Sa presidente de custa formatzione noa at a èssere Alessandra Ferreli, sa vitze presidente at a èssere Daniele Seu, e pro agabbare, su segretàriu Bruno Moi, su fundadore  istòricu de sa sotziedade.

Paris cun issos, a los agiudare un’iscuadra de allenadores pro s’istajone agigu concruida dae Mattia Minetto osteòpata e preparadore atlèticu e arrichidu, printzipiande dae ocannu, dae  Alessandro Garutti, chi at bintu una medàllia de brunzu in su 2020 pro sa carriera isportiva sua in su basket, dae atleta a tècnicu a dirigente de s’Olimpia Milano.

“Pro mene- at naradu sa presidente noa- est unu desafiu chi bògio afrontare cun passione e impinnu, in unu perìodu istòricu comente su chi semus bivende chi est aici particulare pro sos giòvanos nostros, chi tenent bodòngiu de seguresa e de tzertesas”

Sa presèntzia de s’ASD Bascket Tortolì est una cosa importante meda pro sa tzitade de Tortolì pro ite donat medas possibilidade de ispàssiu de de desaogu a sos minores, ma fintzas pro s’isport. Fàghere isport difatis est fundamentale pro sa crèschida de sos pitzocos, siat in unu puntu de bista fìsicu siat dae su puntu de vista de su caràtere, e si s’atleta est predispostu pro unu giogu de iscuadra. Su basket est intre sas disciplinas chi esaltat de prus custu aspetu , declinadu posca in possibilidades e esperièntzias plùrimas fintzas collaterales. Giogare a  bascket cheret nàrrere tènnere sa tzertesa de intrare a unu grandu grupu, belle una famìlia allargada in sa cale s’acollint pitzocos e pitzocas chi mai ant proadu a fàghere isport, pro vàrias resones e làcanas: su basket est  sotziale e inclusivu. Su Basket Tortuelie est intradu a fàghere parte de sa Dinamo Academy. Custa est de pro sese una resone bona pro bìvere custa esperièntzia a presu de sos Campiones de Sèrie A. Sos osservadores de sa sotziedade chi militat in sa màssima sèrias, at notadu sa voluntade nostra de crèschere, de progetare e realizare sos obietivos prefissados.

“Progetto finanziato con l’Avviso Pubblico IMPRENTAS annualità 2021-2022”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”