Sas ses piseddas protagonistas de su programma famadu de Rai 2 ant fatu tapa a Baunei, bisitende unas cantas perlas de su territòriu, comente  Golgo, sa Crèsia de Santu Pedru e Is Piscinas. A pustis de custa essida traballosa sunt torradas a bidda e si sunt pasadas in un’albergu de Santa Maria Navarresa.

Donnavventura, su programma istadiale meda sighidu in direta in Rai 2 ogni domìniga a mesudie, at puntadu sas telecàmeras sua subra de s’Ogliastra. Sas ses protagonistas, ant fatu tapa a Baunei, sa bidda de su Supramonte, e ant bisitadu una parte de sas bellesas naturalìsticas prus famadas de su sartu suo, comente Golgo, sa Crèsia de Santu Pedru e Is Piscinas. Bellesas ùnicas chi ant a andare in unda in Rai 2, faghendelas connòschere a su pùblicu mannu de totu Itàlia. Una publitzidade importante pro sa bidda ogiastrina.

A acumpangiare sas piseddas e s’iscuadra televisiva a esplorare sas bellesas baunesas est istadu Andrea Barca, de sa BedBike Baunei, chi at frunidu sas bitzicletas ispetziales adatadas pro sas ripresas.

Ma sa prima tapa ogiastrina pro sas pitzocas de Donnavventura, protagonistas de s’ispetàculu televisivu famadu meda, chi como benit trasmìtidu dae Rai 2, est istada sa bidda de Ulassa. Sas ses piseddas de su programma istòricu nàschidu in  Mediaset, sunt andadas a s’iscoberta de su territòriu de Ulassa. Unu giru  fatu de sos Tacos e de sa gruta de Su Màrmuri, finas a lòmpere a s’istrùmpu de Lequarci, una de sas atratziones turìsticas prus famadas e ammiradas de sa zona.

Donnavventura est unu programa televisivu italianu de gènere docu-reality atzentradu subra de sos biàgios, a su presente trasmìtidu subra de Rai 2 sa domìniga a sas 12:05. Su programat, in manera pretzedente connotu petzi comente  Donnavventura, est istadu trasmìtidu dae Rai 1 de su 1989 a su 1994 e, dae Rete 4 dae su 1994 a su 2020 sa domìniga a sas 13:55.

Su programa ammustrat de sas ispeditziones beras acumpridas dae sas protagonistas de sas puntadas, est a nàrrere unas cantas fèminas, e assumet fintzas su ruolu de programa documentarìsticu chi mustra a sos ispetadores sos logos e sos benes culturales issoro. Una curiosidade, sa sigla ufitziale de su programma est Over the Rainbow de Israel Kamakawiwo’ole, chi dae su 2012 est sostituida dae sa versione de Chiara Galiazzo.

 “Progetto finanziato con l’Avviso Pubblico IMPRENTAS annualità 2021-2022”

Sa crisi de sos Prontu Succursos in Sardigna: sa Regione refformat su sistema.

Sa Regione Sardigna faghet partire una refforma funduda de sos prontu succursos po accomettare in manera importante sa mancantzia de personale sanidariu e binchere su ricursu a solutziones de emergentzia adottadas in sos urtimos annos.

Po s’iscadentzia de frearzu de sos cuntrattos de sos duttores “gettonistas” impittados supra coditzes minores, s’amministratzione regionale at deffinidu unu pianu padriu chi puntat a garantire sa continuidade de sos servitzios, affortigare su personale e mezzorare sas cunditziones de tribagliu de su mattessi personale.

Incumintzande dae su mese de martu, s’assistentzia de sos “coditzes minores”, sos casos prus pagu graes chi arribant a sos prontu succursos, no at essere prus affidada a duttores de fora. Sa cobertura de sos turnos at essere assigurada dae duttores giai cun su cuntrattu po sos coditzes prus artos, sos cuntrattos de sos cales ant a balere fintzas a su 30 de lampadas.

Sa conduida de s’inari at essere abbentaditta e modulada supra sas esigentzias reales de sas ASL, cun s’intentu de iscansare serradas a tempus, minimadas de s’orariu de servitziu o discumbenias po sos malaidos. Fintzas a oe bi sunt bistadas protestas meda.

In manera parallela, sa Regione puntat a affortigare in manera firma su personale mo mesu de assuntziones novas. S’Agentzia regionale de sa salude at a faghere partire unu cuncursu pubbricu po 44 arreggentes meigos ispecialitzados in emergentzia-urgentzia. Sas protzeduras si ant a congruire in casi duos meses, permittinde s’intrada in servitziu de sos duttores novos intro de su mese de maju e apparande gai unu primu sulenu a chie est prus in difficultade.

Su pianu regionale no est solu assuntziones. Un’attentzione particulare bi est fintzas po su personale chi tribagliat giai in sos prontu succursos, chi a s’ispissu tribagliat meda de prus de su chi depet cun cundissiones cumplessas. Intro de su mese de frearzu s’Assessoradu regionale de sa Sanidade at a dividire intre sas ASL s’indennidade de prontu succursu chi bi est in su cuntrattu natzionale po su personale sanidariu, sos infermieris, tennicos, de su recuberu e po sos chi sunt
impignados in sos servitzios de emergentzia.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22