Fintzas in Sardigna totu prontu pro sas operatziones de allestimentu de sos sègios in bista de sas eletziones de domìnigu su 12 de làmpadas. Si votat de sas 7 a sas 23: 220 mìgia  tzitadinos sunt mutidos a sas urnas pro su rinnovu de sìndigos e Consìgios comunales in 65 tzentros, mentras totu su corpus eletorale de s’Ìsula s’at a espressare subra de sos 5 referendum subra de sa giustìtzia promòvidos dae Lega e Radicali. Cras s’11 de làmpadas, at a èssere die de mudìmene eletorale. Su 12 a note, a pustis de sa serrada de sos sègios at a comintzare s’iscrutìniu de sas ischedas subra de sos chimbe cuesitos de su referendum. S’ispòlliu pro sas Comunales at a cumentzaee  imbetzes de sas 14 de lunis 13.

A s’internu de sos sègios est racumandadu s’impreu de sa mascheredda siat pro sos eletores siat pro sos presidentes e iscrutadores. In duos Comunos (Aristanis, ùnicu cabulogu de provìntzia interessadu e Ceraxus, tzentru de belle trentamila abitantes) est prevìdidu su segundu turnu de ballotàgiu su 26 de làmpadas.

In totu sunt 110 sos candidados sìndigos, agigu 24 sas fèminas, su 21,8%. Sa pertzentuale feminile creschet, ma abarrat semper suta de su 50%, cunsiderende su nùmeru totale de candidados cussigeris: 1.803, sas fèminas sunt 747, su 42%. In totu sunt istadas presentadas 131 listas. Sunt 27 sos comunos monolista intre sos cales essint a pìgiu tzentros importantes comente  Carluforti e Altzaghena. Sos àteros sunt Castiadas, Nuradda, Pramentelu, Biddaramosa, Gelisuli, Lodine, Orune, Osini, Sòrgunu, Teti, Bidumajore, Miris, Mogorella, Nureci, Sèneghe, Siamanna, Tinnura, Tresnuraghes, Tzorfuliu, Anela, Calanzanus, Fiolinas, Pàdria, Cuzinas, Semèstene. In sos 27 at a serbire su crompimentu de su quorum de su 40% pro chi su votu siat bàlidu: in custu su casu su sìndigu diat pòdere èssere elègidu giai domìniga, a urnas galu abertas.

Sos comunos a sas urnas in sa Tzitade Metropolitana de Casteddu sunt Pula, Cuartùciu e Ceraxus. In Provìntzia de Nùgoro sunt mutidos a su votu sos comunos de Barì, Vitzi, Bolòtana, Gelisulu, Lanusè, Lodine, Lùvula, Onieri, Orune, Osini, Foghesu, Sòrgunu, Teti. In Provìntzia de Aristanis: Bidumajore, Ardaule, Boàtiri, Baulau, Gonnoscodina, Miris, Mogorella, Mragaxori, Nureci, Aristanis, Sagama, Sedilo, Sèneghe, Siamanna, Terrarba, Tinnura, Tresnuraghes, Uras, Tzorfuliu. In Provìntzia de Tàtari: Anela, Altzaghena, Badesi, Bono, Calanzanus, Èrula, Fiolinas, Santu Paulu Loeri, S’Ulumedu, Otieri, Pàdria, Cuzinas, Semèstene, Istintinu, Tissi, Turalva. In sa Provìntzia de su Sud Sardigna: Carluforti, Castiadas, Nuradda, Nuxis, Pramentelu, Portuscusi, Samassi, Santu Sperau, Santu Antiogu, Serri, Silìcua, Sriugus Donigalla, Biddaramosa, Bidda Sorris.

 “Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22