«Mètodu Pintus, mètodu Pintus». Est sa boghe de Modric in s’ispolliatoju de su Real Madrid, a su momentu de sa festa pro sa vitòria incredìbile contra su Manchester City de Pep Guardiola. Su fuoriclasse croatu abbratzat su preparadore atlèticu Antonio Pintus, nòdidu a totus comente a su sergente dae ferru, li dat unu basu e unu carignu in conca. Si bidet totu custu in su vìdeu cumpartzidu dae sos Blancos. Dae segus a sas resessidas de su Real b’at unu sardu. Est su preparadore Pintus, s’òmine capatzu de bìnchere in totue gràtzias a s’alimentatzione personalitzada e a su traballu cun e sena botza. Pintus est nàschidu a Torinu in su  1962, ma sa famìlia sua est de Sètimu.

A s’Inter, sa de s’iscudetu firmadu Antonio Conte, si l’ammentant bene. E si l’ammentat fintzas Lukaku, agiuadu meda dae Pintus, chi l’at rèndidu un’atleta cumpletu, isfrutende sa sua fisitzidade importante. Ma giai cun Zinedine Zidane, semper in su Real Madrid, aiat otentu resurtados mannos. Cun sas duas (de sas tres) Champions de fila de pare  a dimustratzione de su traballu suo. Giai in su 2017 fiat istadu Marcelo a esaltare su traballu de Antonio: «Si istamus gasi bene in manera fìsica su mèritu est de Pintus. Amus ispintu meda a cumintzu istajone e peri durante sas vacàntzias de Nadale», aiat naradu su brasilianu.

Unu preparadore prenu de passione, chi si faghet amare dae sos giogadores  nointames sa fortza sua siat sa de los fàghere fadiare. Comente cando in su nadale de su 2017 aiat fatu fàghere a sos giogadores de Zizou subra de e giosso curre·curre subra de sas iscalas de su Bernabeu. Su frantzesu si fiat amoradu de Pintus a sos tempos de sa Juventus, cando in biancunieddu aiat bintu duos iscudetos, una Supercopa Italiana, una Supercopa europea e una Copa Intercontinentale, presentende·si a su Mundiale de domo, su de su 1998 bintu 3-0 contra su Brasile, protagonista in assolutu. Pintus fiat giai in sa Juventus in su 1996. Est cun Marcello Lippi chi aiat bintu sa sua in antis Champions (e a su presente s’ùrtima de sos bianconeri, cudda contra s’Ajax a sos rigores a s’Olìmpicu), pro posca bìnchere su tìtulu europeu fintzas in su 2017 e in su 2018 cun sos Blancos. E tènnere s’ocasione de atzentrare sa personale de bator su 28 maju in Parigi in finale contra su Liverpool.

 “Progetto finanziato con l’Avviso Pubblico IMPRENTAS annualità 2021-2022”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”