Retzetas locales e internatzionales, unu disafiu gastronòmicu intre coghineris bènnidos dae totu su mundu, addòbios acapiados a su tema de su tunnu ruju de calidade chi dae sèculos si piscat in sa tonnara de s’ìsula de Santu Pedru.
A acostagiare su Comunu de Carluforti in s’organizatzione e comunicatzione de sa rassigna b’at a àere s’agèntzia Feedback chi sighit su progetu dae sa nàschida.

Sa cultura millenària acapiadas a su tunnu e a sas tonnaras chi inoghe s’espressat in una traditzione pluriseculare de pisca chi si rinnovat dae su 1738, annu de fundatzione de sa tzitadina, est s’elementu comunu de una manifestatzione ùnica in su gènere suo chi interessat gastrònomos, coghineris de fama internatzionale espertos de coghina de tunnu, giornalistas e espertos de sa gastronomia mediterrànea, candidende Carluforti a  “Capitale de su tunnu de calidade”.
Sa tzitadina tabarchina at a devènnere torra su palcoscènicu  pro unu momentu de cunfrontu e iscàmbiu culturale intre sas regiones mediterràneas chi ancora mantenent bia sa cultura de tunnos e tonnaras. Fintzas ocannu sa rassigna at a èssere organizada cun s’amparu de Tonnare Piam, sotziedade chi gestit sa tunnara de Carluforti.

Momentu tzentrale at a èssere semper sa gara gastronòmica internatzionale, s’International Tuna Competition, a sa cale ant a partetzipare coghineris de diversos Paisos chi ant a ammaniare retzetas a base de tunnu cotu e cruu. A giudicare sos pratos b’at a àere una giuria tècnica, formada dae giornalistas, espertos e opinionistas  chi at a èssere presidida dae Paolo Marchi, imbentore de Identità golose, su primu cungressu italianu de coghina, ma fintzas una giuria populare, formada dae sos visitadores de sa manifestatzione chi at a atribuire unu prèmiu dedicadu.
Su programma de sa rassigna at a dare ispàtziu fintzas a sa coghina in biu chi ant a avalorare totu sas retzetas a base de tunnu, interpretadas dae coghineris italianos, coordinados e seletzionados dae su coghineri carlofortinu Luigi Pomata. A presentare totu sos apuntamentos dae su palcu at a èssere Federico Quaranta, presentatore Rai e boghe de sa trasmissione radiofònica Decanter.

Torrat fintzas s’Expo village, su bidditzolu espositivu chi oferit a sos bisitadores sa possibilidade de fàghere comporare, ogni die finas a mesunote, sas ispetzializades agroalimentares locales e sos produtos de s’artesania sarda. In su Tuna village, su bidditzolu gastronòmicu de sa manifestatzione, imbetzes, su tunnu est su protagonista: in sa banchina Mama Mahon ogni die tastu de ispetzializade a base de su prìntzipe de su mare!

 “Progetto finanziato con l’Avviso Pubblico IMPRENTAS annualità 2021-2022”

Ulassai si preparat a sa Biennale de arte de custos tempos.

Ulassai si preparat a accasazare un’edissione nova de sa Biennale de arte de custos tempos, un’addobiu culturale chi in sos urtimos annos est assuminde unu rolu semper prus importante in sa bista artistica de sa Sardigna. S’abbenimentu at a partire su 21 de martu, revertinde pro paritzos meses sa bidda ozzastrina in d’unu logu de addobiu pro artistas, istudiosos, appassionados e bisitadores chi arribant dae donzi parte de s’isula e non solu.

Mustras, istallatziones, addobios e mamentos de cunfrontu ant a animare sos logos de sa bidda, apparande a su pubbricu s’occasione de si accostare a s’arte de custos tempos e de iscoperrere limbazos creativos novos. Sa Biennale est dedicada a sa frigura de Maria Lai, una de sas prus importantes artistas italianas de su Noighentos e ligada in manera funguda a sa terra sua de issida. Ulassai est difattis sa bidda in sa cale s’artista est naschida e inube at dassadu unu signu forte meda pro mesu de paritzas operas chi negossiant cun sa bista e sa comunidade.

S’edissione de su 2026 de sa Biennale at a tennere comente tema sa lettura de un’opera de arte. S’intentu est cussu de cumbidare su pubbricu a abbaidare sas operas cun meda prus attentzione, chircande de cumprendere sos signifficos e sos nuntzos. Sa derettura artistica de s’abbenimentu est intregada a Gianni Murtas,
cun sos curadores istranzos Giannella Demuro, Ivo Serafino Fenu e Francesca  Sassu. Su tribagliu insoro at giuttu a sa creatzione de unu programma chi ponet impare artistas e operas capatzes de faeddare cun s’iscrocca, cun s’istoria de sa bidda e su pensamentu artisticu de Maria Lai.

A sa Biennale ant a partetzipare prus de vinti artistas chi arribant dae tottue, donzunu cun su propriu limbazu e sa propria chirca. Sas operas ant essere ispartas in paritzos logos de sa bidda, non solu in logos museales ma fintzas in atteros logos culturales e in carchi zura in fora.Custu at a permittere a sos bisitadores de iscoperrere Ulassai: sa Biennale est fintzas un’occasione importante po balorizzare s’iscrocca de s’Ozzastra e favoressere su turismu culturale.

Manifestassiones comente sa Biennale mustrant comente sas biddizolas potant divennere logos de interessu culturale mannu cando resessint a balorizzare s’identidade e su patrimoniu propriu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22