Sardigna si cunfirmat a livellu natzionale sa regione cun prus banderas biaitas: bìndighi sas localidades premiadas dae su reconnoschimentu de sa Fundatzione pro s’educatzione ambientale (Fee) chi garantit marinas netas e mare lìmpidu, cun unu passu a in antis respetu a s’annu coladu rapresentadu dae s’intrada de Budune.

A custos nùmeros s’agiunghent posca sas banderas biaitas pro sos aprodos, deghe in totu. Sa Sardigna in generale est a su de sete postos in Itàlia fatu fatu Ligùria (32), Campània, Toscana e Pùglia (18), Calàbria e Marche (17).

A s’internu de s’Ìsula a fàghere de maere est s’ex provìntzia de Tàtari cun unu tertzu de sos reconnoschimentos: premiados Badesi, Casteddu Sardu, Sòssu, Sassari, Lungone, Aglientu, Trinidades de Agultu-Vignola, Sa Madalena, Palau, Budune, intrada in su 2022. Posca b’at Aristanis, Cuartu Sant’Aleni e Santu Antiogu, e pro s’Ogiastra Tortuelie e Barì.

Proportziones chi si poderant belle fintzas in sa graduatòria de sos portigheddos. Su nord de sa Sardigna binchet Cala Gavetta (Sa Madalena), Portu turìsticu comunale de Palau (Palau), Portu de Lungone, Marina de s’Orso de Poltu Quatu (Altzaghena), Porto Cervo Marina (Altzaghena), Marina de Porto Rotondo (Terranoa), Marina de Portisco (Terranoa), Porto turìsticu de Casteddu Sardu. In Ogiastra reconnoschimentu a Marina de Baunei e Santa Maria Navarresa. Mentras su sud Sardigna si devet acuntentare de sa Marina de Capitana, in su litorale de Cuartu.

Fintzas ocannu – ispiegat sa Fee- est istada donada importàntzia manna a sa gestione de su territòriu e a s’educatzione  ambientale promòvidos dae  sas amministratziones pro preservare s’ambiente e promòvere unu turismu sustenìbile. Unos cantos indicadores: impiantos de depuratzione e retzas fognàrias, gestione de sos refudos, initziativas de promòtzione pro una mègius vivibilidade  in su perìodu istadiale, valorizatzione de sas àreas naturalìsticas, cura de s’arredu urbanu e de sas marinas, possibilidades de atzessu a su mare pro totus sena limitatziones.

 “Progetto finanziato con l’Avviso Pubblico IMPRENTAS annualità 2021-2022”

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22