Mancu sas bombas de su 1943, chi aiant betadu a terra bona parte de Casteddu, aiant firmadu sa  traditzione de su pellegrinàgiu dae Stampaxi a Nora, comintzada in su 1657. Sa tzitade fiat istada destruida dae sas bombas de sos alleados in ghennàrgiu, posca su 26 e su 28 freàrgiu e poi in s’abrile de su 1943. In Casteddu biviant pagas persones, belle totus pòveras meda, chi non fiant resèssidas a si nche fuire in sas biddas pro si sarbare dae sa bombas.

Epuru, gràtzias a su coràgiu de unas cantas persones, sa professone si fiat fata. Cun sa beneditzione de s’archipìscamu missegnore Piovella, isfolladu a Nurri, a inghìriu de sas sete de su mangianu de su primu maju, su corteu aiat mòvidu dae sa cresiedda de Stampaxi. S’istàtua de su Santu fiat istada assegurada subra de su cascione de un’autocarru 1100 de unu tzertu Giannetto Gorini, chi s’ocupaiat in tzitade de su trasportu de su late. A sa ghia Giovanni Vargiu. Sa cresiedda fiat istada risparmiada dae sas bombas mentras s’intrada sua fiat istada liberadu dae su materiale pro pòdere permìtere s’arribu de su camiontzinu.

De cussu atu de fide esistet su film giradu dae Marino Cao, cun una kodak 8 millìmetros. A fàghere connòschere cussas imàgines fiat istadu Maria Piera Mossa, regista e programmista Rai, chi in su 1989 aiat recuperadu su filmadu. Unu documentu chi paris cun sa professone contat comente  su tzentru de Casteddu, esseret istadu belle distrùidu dae sos bombardamentos: sos fotogrammas ammustrant bia Azuni, sa crèsia de Sant’Anna, pratza Yenne, Largo Carlo Felice, e ancora bia Sassari e pratza de su Càrmine cun totu sas domos isciusciadas. Poi si bidet a Santu Efis chi sighit su caminu suo finas a s’istatzione ferruviària de pratza Matteotti.

Su pellegrinàgiu aiat sighidu. Sas tapas fiant istadas Sarrocu,  Santu Pedru, in domo de su cavalieri Mario Atzori, e posca Pula. Inie mìgias de persones, arrischende sa vida, aiant sighidu su Santu a pee finas a Nora, su logu de su martìriu de su Santu. Una testimonia ispantosa de fide chi durat finas immoe.