omente a totus ischint sa pitzeta isfòglia est una liconia tìpica de sa Sardigna, difatis est istada imbentada a Casteddu. Semper presente in totu sos tzilleris e in sos cùmbidos, durante sas riuniones de traballu formales e a sas festas de cumpleannu, oramai parte chi sena de issa non bi siat festa. Dae oe custa bonidade est istada reconnota dae su PAT (Produtos agroalimentares traditzionales), comente  produtu traditzionale a totu sos efetos, suta de sa categoria de sos produtos de furru. A dare sa noa in Instagram est unu nòdidu produtore casteddaju, mere de sa butega Porta 1918, chi dae annos produet ogni die chentinas de pitzetas.

No est fàtzile intrare in su registru, difatis totu sos produtos devent èssere otentos cun unu tipu de traballadura, cunservatzione e istajonadura durajolos e depet èssere difùndidos in totu territòriu interessadu, segundu règulas traditzionales pro a su mancu bintighimbe annos.

Pro realizare sas pitzetas comente las ammàniant in Casteddu, serbit passada de tomata e orìganu cantu bastat, 2 motzarellas, 5 ròtolos de pasta isfòglia, ògiu de ghermanu, 2 oos, tàpara, atzua o pasta de atzua.

Tendides sa pasta isfòglia e segades 12 tundinos de 6 tzentìmetros de diàmetru cun una tassa bortada; ponide s’ou in sos oros de ogni tundinu, lassende su tzentru netu.

Cundide  petzi unu tundinu de pasta e lassase unu bòidu pro cugugiare posca sa pitzeta. Cun unu ròtolo de pasta isfòglia ais a dèvere otènnere 6 tundinos cundidos e 6 bòidos de impreare pro serrare sa pitzeta; ponide a su tzentru de su tundinu de pasta isfòglia duos cutzarinos de passada de tomata.

Segade sa motzarella a tacheddos piticos e agiunghide·la a su tzentru de su tundinu;  betade una ispruinada de orìganu, unu pagu de sale e un’istiddu de ògiu de ghermanu.

Si cherides podides agiùnghere una tàpara/o un’atzua comente est in sa retzeta originale.

Allumade su furru a 180 grados in modalidade istàtica. Serrade sa pitzeta cun s’àteru tundinu sena cundire, incarchende in manera lèbia sos oros. Prima de las pònnere in su furru donare una pinzellada de ou e coghinade totu a 180° C pro 25-30 minutos. Faghet a las mandigare caentes, opuru fritas, e si cunservant pro una pariga de dies in logu isciutu.

 “Progetto finanziato con l’Avviso Pubblico IMPRENTAS annualità 2021-2022”

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22