Cumentzamus a bìdere cale est sa situatzione atuale in Itàlia. Segundu sos datos de Annuncilavoro360 sa sotziedade italiana pòmpiat semper de prus a sas tecnologias noas e a s’impreu de Internèt. Sa professione prus chircada est cussa de s’ingennieri,  sighida dae s’autista e dae su contàbile. Ma a segunda de sas regiones b’at calicuna diferèntzia. Pro esèmpiu in Lombardia su traballu prus chircadu est cussu de s’operaju, sighidu dae s’impreadu, dae s’espertu de  mercadu, s’ingennieri in Emìlia Romagna e su magasineri  in Vènetu. Tocat a nàrrere ca Lombardia, Vènetu, Emìlia Romagna rapresentat sa parte prus manna meda de sas propostas de traballu, sende chi a solas lompent a 100.000, contra sas 12.000 de  Molise, Basilicata, Sardigna e Calàbria postas a pare.

Tipologia de cuntratu. Bida s’inseguridade causada dae sa gherra, a su presente giai b’at una majore proposta de cuntratos flessìbiles e a tempus determinadu. Belle ogni 10 cuntratos a tempus partziale bi nd’at unu ebbia a tempus prenu e indeterminadu.  Sas àteras formas de cuntratos sunt de collaboratzione esterna a s’azienda, opuru de tirotzìniu chi permitit a sas aziendas de atzèdere a sos intzentivos istatales.

Sos tìtulos de istùdiu. Su tìtulu de istùdiu prus rechertu est su diploma de maturidade. Ogna tres rechestas de traballu pro diplomados bi nd’at una ebbia acanta si pedit sa làurea. Peus ancora andat sa rechesta de personale ispetzializadu (master) una ogna 100 propostas de traballu.  In s’ùrtimu mese però b’est istada una tendèntzia particulare, cun prus annùntzios de traballu pro chie tenet solu su diploma de s’iscola de s’òbrigu e pro chie tenet su dotoradu in diversos setores. A ogna contu est possìbile chi sa gherra in Ucràina at a sighire a cunditzionare galu de prus su mundu de su traballu e duncas peri sa tipologia de  tìtulos rechestos.

“Progetto finanziato con l’Avviso Pubblico IMPRENTAS annualità 2021-2022”

Andria Parodi, sìmbulu de sa Sardigna e boghe chi nos mancat ancora oe.

Andria Parodi abbarrat unu de sos cantadore e musicistas pius bene crèfidos de sa Sardigna, sìmbulu de un’ìsula chi cantat s’identidade e sa cultura sua a mèdiu de sa mùsica. Andria est nàschidu in Casteddu in su 1967 e at ischidu betare a pare connotu e modernidade, faghinde appretziare su patrimòniu musicale sardu a unu pùblicu natzionale e internatzionale gràssias a sa boghe sua, potente e ùnica.

Sa carriera de Parodi est comintzada cun sos Tazenda, unu sòtziu chi at mudadu meda su panorama musicale sardu cun unu sound chi est ùnicu e capatze de ammesturare folk, rock e sonoridades sardas. Sa boghe sua est divènnida luego comente una marca de fàbrica de unu sòtziu chi at ischidu contare sa Sardigna a manera autèntica e contemporànea. In s’andare de sos annos, Parodi at poi cantadu a sa sola, sena sos Tazenda, ma a bortas cantande puru cun cantadores italianos e istranzos, semper però cun unu ligàmene mannu cun sa terra sua.

Parodi no est istadu unu musicista ebbia, ma est istadu puru unu tistimonzu de sa cultura sarda. sas cantones suas nos contant istòrias de sa vida de cada die, memòria de su connotu de totus chi at raighinas profundas, diveninde puru comente a unu ponte dae su tempus coladu a su presente. Si nch’est mortu chi non fuit betzu ancora, in su 2006, e nos at lassadu un’arrastu mannu in sa mùsica sarda, ma finztas in sa mùsica italiana. Sa boghe sua, ancora oe, sighit a cantare in sos ammentos de totus chi li torrant gràssias mannas po cussu chi at fatu po s’ìsula nostra.

Oe, Andria Parodi est unu esèmpiu mannu po sos cantadores e musicistas noitolos puru, est unu mastru mannu, unu sìmbulu de totu canta sa Sardigna. Festival, cuntzertos de tributu e regortas chi ant fatu a pustis de sa morte sua nos faghent a cumprèndere cantu mannu siat s’ereu artìsticu e culturale sou, chi est meda pius mannu de sas nodas musicales suas. Totu custu est sinnale mannu de cantu issu siat istadu ambassadore de sa Sardigna in totu su mundu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22