Sa Giunta Solinas, pro proposta de s’assessore regionale de s’Igiene e sanidade e de s’Assistèntzia sotziale, Mario Nieddu, at aprovadu fintzas pro su 2022 su programma “Nidos gratis” a amparu de sas famìlias cun fìgios in sa fàscia de edade dae zero a sos tres annos. Sa mesura previdet unu contributu pro s’abbatimentu de sos costos pro sa frecuèntzia de sos nidos, micronidos, setziones primavera, nidos domitziliares e nidos aziendales, pùblicos e privados, cunventzionados o nono cun sos Comunos.

 “Cun custu provedimentu cunfirmamus s’impinnu  nostru a difesa de sas famìlias”, decrarat su Presidente de sa Regione, Christian Solinas. “Su perfetzionamentu de unu sistema de interventos e servìtzios funtzionales a sas netzessidades de sos tzitadinos in sas diversas fases de sa vida, cumpresa sa prima infàntzia e su sèberu de sa genitorialidade, mescamente in sa difìtzile cuntziliatzione vida-traballu, faghet parte de sos obietivos istratègicos de su Pranu Regionale de sos Servìtzios a sa persone”, sutalìniat su Presidente, ammentende chi su programma ‘Nidos gratis’ at retzidu unu finantziamentu de 5,5 milliones de èuros s’annu pro su triènniu 2021-2023, cunfirmados pro su triènniu 2022-2024 in s’ùrtima lege finantziària.

“Faeddamus de una mesura sena duda importante, bida fintzas sa crisi econòmica aumentada dae sa pandemia”, decrarat s’assessore regionale de sa Sanidade, Mario Nieddu. “Su chi semus proponende — sutalìniat s’assessore — est unu modellu de  polìtica sotziale ‘generativu’, in ue sa famìlia est una risursa subrasa cale investire tràmite interventos chi siant a tretu de megiorare sa calidade de sa vida e prodùere recadimentos positivos subra totu sa  colletividade”.

Nidos gratis s’ìntegrat cun su Bonus Nidos erogadu dae s’Inps e podet èssere rechertu dae sas famìlias chi apant fatu dimanda pro sa mesura natzionale e siant giai resurtadas idòneas pro cust’ùrtima. Sas dimandas  devent èssere presentadas a sos Comunos acanta sunt assetiadas sas istruturas chi oferint sos servìtzios pro sa prima infàntzia usufruidos. Pro pòdere èssere ammìtidos a sa mesura s’ISEE de su nùcleu familiare no at a dèvere superare sos 40.000 èuros. Su contributu regionale at a èssere uguale a sa diferèntzia intre s’importu de sa reta mancu su Bonus Nidos Inps, finas a sa cobertura de sos costos de su servìtziu e comente si siat intro unu màssimu de 2.200 èuros, partzidos in 11 mensilidades de 200 èuros.

 “Progetto finanziato con l’Avviso Pubblico IMPRENTAS annualità 2021-2022”