S’idrògenu intrat a su benidore energèticu fintzas de sa Sardigna. Agiuadu, comente  àteras fontes lìmpias, de su Pranu de Ripresa e Resilièntzia, at tentu su parre positivu de sa Regione pro impiantos de fraigare in sas àreas industriales serradas. Sas tapas imbenientes tapa sunt sos bandos pùblicos pro finantziare sos traballos. “Amus a predispònnere unu bandu pro sa presentada de sas manifestatziones de interessu pro s’atzessu a sos fundos pro sa produtzione de idrògenu birde, prodùidu cun fontes energèticas rennoaditzas” ispiegat s’Assessora a s’Indùstria, Anita Pili. Sa Regione at adotadu una deliberatzione respetende s’avisu chi su Ministeru de sa Transitzione ecològica at publicadu in ghennàrgiu pro sas Regiones. Su passàgiu a sa produtzione de idrògenu birde, in realidade, est sa punna de unu pianu prus articuladu, bidu su ligàmine istrintu cun sos pranos de decarbonizatzione de s’Ue. Si tratat de ricunvertire in sos vàrios Paisos, sistemas de alimentatzione energètica de sas fontes fòssiles a s’idrògenu chi non luat. Dae unos cantos mese in Itàlia s’est mòvida fintzas sa Regione Abrutzu.

Sa Regione- agiunghet s’assessora Pili- at identificadu s’idrògenu comente  vetore istratègicu in su Pranu energèticu ambientale regionale suo pro su 2015-2030 (Pears) e s’atzessu a su bandu diat ofèrrere s’oportunidade de aviare sa realizatzione de un’economia suportada dae custa fonte . Su cuadru regionale de àreas dismissas, in sa carta, favorit una sìmile programatzione ma est a bìdere in su cuncretu comente  s’at a articulare a pustis de s’emissione de sos bandos pùblicos. B’at medas sitos cun territòrios idòneos pro s’isvilupu de progetos in iscala locale e una tzerta densidade de impiantos de produtzione de energia elètrica. S’idrògenu birde diat dèvere sostituire cantidades mannas de ògiu combustìbile a su presente impreadu in sos giassos in atividade. Si faeddat de àmbitos territoriales “chi diant pòdere favorire sa sinergia intre sos vàrios setores energèticos, bilantziende s’impreu de energia elètrica e gas e favorire s’integratzione e s’isfrutamentu in loco de sa produtzione chi benit dae sas rennoaditzas” ispiegat ancora s’Assessora Pili. Sos impiantos noos, ultres a sos eletrolizadores — coro de su sistema de produtzione- ant a dèpere èssere progetados cun critèrios de acùmulu de s’energia prodùida e impiantos de immagasinamentu in favore de sos territòrios. Parte importante in s’iter progetuale e autorizativu est sa sostenibilidade ambientale. At a bisongiare averguare in cuncretu comente ant a èssere aplicados custos printzìpios chi non petzi in Sardigna sunt istados impreados pro meda tempus in modu istrumentale pro blocare progetos subra sas fontes alternativas. Giai  dae printzìpiu su protzessu industriale pro otènnere idrògenu birde tenet costos artos. In ogni manera su guvernu in s’avisu a sas Regiones at fissadu in manera giusta tempos istrintos pro sos impiantos industriales benidores: s’ant a dèpere concruire intro su 31 de mese de idas de su 2025.

 “Progetto finanziato con l’Avviso Pubblico IMPRENTAS annualità 2021-2022”

Chircas in cursu in Sardigna pro Elia Del Grande, s’òmine chi in su 1998 at isterminadu sa famìlia in su Varesotu.

Sighint in Sardigna sas chircas de Elia Del Grande, s’òmine chi in su 1998 at bochidu su babbu, sa mamma e su frade in sa domo de famìlia a Cadrezzate, in sa provìntzia de Varese. A pustis de àere pagadu sa pena pro su mortorzu triplu, Del Grande fiat istranzu de sa presone de Castelfranco Emilia (Mòdena), in ue si nch’agataiat pro resones de seguresa e ca lu cunsideraiant ancora perigulosu pro sa sotziedade.

Segundu sa politzia s’òmine diat èssere lòmpidu a fuire calendesi dae su muru de tanca de s’istrutura penitenziària impreande una corda fatta cun filos elètricos. Dae sa notte de s’evasione, sas fortzas de s’òrdine ant cumintzadu una operatzione manna de chirca, allargada como fintzas in Sardigna, in ue si creet chi siat bennidu o tènzat cuntatos.

Su Dipartimentu de s’amministratzione penitenziària at dispostu una chirca interna pro ischirriare comente siat istadu possìbile chi unu presoneri cussideradu perigulosu siat lòmpidu a ischivare sa sorveglianza in una istrutura de seguresa mèdia. Elia Del Grande, oe de 49 annos, est devènnidu tristemente connotu pro cussa chi sos medios de comunicatzione ant torradu a narare s’istrage de sos forneris. Su 7 de bennàrzu de su 1998, a s’edade de 22 annos, at bochidu sos genitores suos e su frade mannu, cun su cale manizaiat una panificatzione de famìlia. A pustis de su delitu est fuidu in Isvìtzera, ma est istadu frimmadu pagas dies a pustis e at cunfessadu in presse su chi fit acontèssidu.

Cundennadu in Appellu a 30 annos de presone cun su reconnoschimentu de sa semi- infermitade mentale, Del Grande at passadu in presone 25 annos in antis de èssere tramudadu in d’una istrutura cun vigilàntzia iscainada. Sas fortzas de s’òrdine cussizant sa massima abbistesa e a sinnalare cale si siat possìbile abbistamentu s’obietivu est agatare su fuidu in su prus pagu tempu possìbile e accrarare sas circumstàntzias de s’evasione.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”